L'acquit des harens portés hors Dieppe.

Il est assavoir que marchans portans harens hors la ville de Dieppe, soient de la ville ou estrangiers, se ilz ne sont frans, doivent viii d. de chascun millier au petit compte, soient sallez ou freez. Et se aucun porte jusquez a la value de xii d. oultre le droit {Fol. 27}compte du millier, selon l'usage de la ville, il en doit i d. ; et jusques a [vc], n'en doit que i d.

Item, s'aucuns marchans portans harens hors de ladite ville ait pluseurs chevaulx, et les harens soient siens sans parchonniers, et il y ait sur chascun des chevaulx aucune chose oultre le droit millier, ce que est par dessus le droit nombre, l'en ne le doit pas compter de chascun cheval, mais de tous ensemble, pour ce que il seroit prouvé que ce soit tout a un homme, et doit paier du surplus au feur du millier.

Item, tous ceulz qui trepassent par la ville portant harenc, paient au telle coustume comme ceulx qui le prennent en la ville et les prennent hors de la ville. Toutes personnes qui portent harens et poissons hors de Dieppe a leur col pour leurs estoremens, ne doivent riens ; mais se ilz sont marchans et le portent pour revendre, ilz doivent coustume se ilz ne sont frans.