La coustume du revendage cy aprés ensuit et le droit appartenant au revendeur.

Il est vray que a Dieppe puet avoir tant de revendeurs de choses prisez par justice et mises au revendage, {Fol. 16}comme il plest a monseigneur et ses gens officiers, et doivent les choses estre prisiez a requeste de partiez par les sergens de Dieppe et bailleez aux frais des biens par iceulz auxdiz revendeurs. Lesquelz revendeurs les doivent mettre nottoirement en vente en veue de peupple par iii jours de marché continuez et doivent recepvoir les offres des marchans et iceulz offrez senefier aux personnes a qui sont les biens estans audit revendage, et les iii marchés passez, ilz sont tenuz, sanz faveur, viii jours aprés passez, a livrer iceulz biens au desrain encherisseur en prennent l'argent du pris, lequel argent doivent paier a cellui qui aura fait faire et requise l'excecucion, et se plus y a d'argent, tous frais raisonnablez paiez, icellui revendeur est tenu de rendre a l'excecuté le surperflu. Et est assavoir que chascun revendeur doit avoir et prendre sur l'argent des biens vendus, pour sa paine et droit de l'office, pour livre, iiii d. t., et de mendre nombre, proratta. Et s'aucune chose est perdue en la garde des revendeurs, ilz sont tenuz de le rendre. Et est assavoir que se aucuns biens leurs sont baillez pour vendre et ilz ne sont venduz, et que le debteur chevisse a son crediteur et les biens sont renduz sanz vendre, le debteur, si comme on dist, est tenu de finer au revendeur tout le mieulx que il puet pour son droit, est assavoir ii d. pour livre. Et ne doyvent les dessusdiz revendeurs relater main plaine ne eulz tenir pour namptiz, se les biens ne sont au revendage, et si font le contraire, ilz sont tenuz d'amender, de prison ou aultrement, selon l'ordonance de la justice et des gens de monseigneur, et en oultre de fournir de leurs bien la somme par eulz^apar eulz écrit en interligne. relatee main plaine au traditeur. Et ne peuvent ne doivent partir ne achetter la chose par eulz vendue par justice.