Aultre coustume coustumiere a Dieppe pour mesures.

Il est assavoir que a monseigneur appartient la congnoissance du gauge et provision sur toutes les mesures tant de grains, beuvrages, aulnagez comme pezages. Et puet la justice de monseigneur et ses gens, touteffoiz que bon leur semble pour eviter aux faulces mesures, faire prendre mesures a grain, vingz, cervoises, aulnez, pois et ballances, et icelles faire apporter a la viconté pour les illeques faire gauger, et se qui ne seroint trouvé suffisant et loyal, est forffait et acquis a monseigneur. Et en oultre, cellui sur qui la chose est trouvee, est tenu de faire amende par l'arbitrage du juge.

Item, nulz ne doit vendre a mesure quelconquez que premierement elle ne soit gaugee par la garde de la viconté gardant l'estallon des mesures, tant poz comme aulnez, et en oultre doivent estre marquieez par icellui du marc de ladite viconté. Pour laquelle chose appartient a ladite garde, a cause de son office, xxvi d. ; est assavoir pour une aulne, ung boissel, demi boissel et aussi pour les poiz d'un vendeur, a la livre jusques a xii l., et aussi des poz a beuvrages et craissiers. Et pevent chascun de Dieppe faire gaugez pot, choppine, demi choppine et demion pour xxvi d., et que ce que ung des iiii ne fait gauger, sy doit il xxvi d.