La coustume du marché de l'estre et maniere du cueillir.

Premierement, de toute chenure vendue par ville, de xii d. jusques a ii s., l'en doit ob ; et de ii s., i d. ; et se la chenure estant au marché est apportee au pois, elle s'acquittera par estimacion du pois sy comme il est dessusdit et paiera coustume au fermier de l'estre et aussy au poys.

Item, de chascune corde, soit vielle ou neufve, vendue par estrangers en la ville, se elle vault xii d., i d. De chascun caable, viel ou neuf, comme dit est, ii d. De chascune somme de noix, pommes, poirez et aultres fruis, poulles, fourmages, esculles, boiteaulx, i d. ; de la cartee, ii d. Mais ceulz qui apportent les choses dessusdites, est assavoir noiz et les ensuivant a leur col, n'en doivent rien. De chascun sac de laine, se il vault plus de xii d., i d. De chascun rés en hermee, soit vielle ou neufve, ii d. Et se elle n'est en armee et elle est acordellee a l'aiguille, i d. De chascun porc vif et vachez vivez, venduez a Dieppe par estrangiers, i d. Et est assavoir que se aucuns frans vendent aucune chose des choses dessusdites, se ilz ne sont fermiers, ilz ne doivent rien.