Acquis de toillez et aultres choses.

Cent aulnes de toisse, iiii d. se elles sont en troussel, en alant de la mer ou a venir de par decha la mer ; et se ilz sont achettés dedens la ville ou aportez de dehors par estrangiers ou ceulx de Deppe, se ilz sont sanz troussel, pour ce l'en doit de chascune piece, i d. Chascun portant une trouche derriere soy, de draps, lingez ou langes, en trepassent la ville, doit ii d.
Chascun estrangé, qui vent draps ou toillez a Dieppe, a estal, il doit de coustume chascun jour, i d. Et est assavoir que nul estranger ne puet vendre aucune derree hors le jour de marché, se n'est par licence de la viconté, et se il fait le contraire, il doit perdre se que il vent, et en quelque jour que il vende, il doit coustume.
Se aucun apporte sur soy drap linge ou toille, en la ville de Deppe et il le porte par la ville et il l'offre a vendre, tant comme il le porte, il n'en doit riens, se il ne le vent. Et s'il est ainsi que il mette le drap ou toille sur estal ou fenestre en intencion de vendre, il doit pour piece, i d., ja soit ce que il ne le vende, et le puet remporter emportant le signe de la viconté, et une aultres fois le puet rapporter vendre et le puet vendre sanz paier coustume. Et est assavoir que pluseurs de Deppe souvent vont aux foires hors de Deppe, portans drapz et toilles, dont ilz paient acquit, qui souvent les rapportent sanz vendre, et depuis ne sont tenus de en paier coustume ou que ilz les portent. Et semblablement d'aultre derrez que une fois aront aquitteez, mais doivent porter le {Fol. 32v}signe de la viconté, en faisant foy que foy aultre fois ont acquittié et paié coustume a la viconté desdites derrees. De chascune benne ou bennechon, cousus ou non, i d.