Coustume pour le passage d'Engleterre.

Chascun qui vient d'Engleterre, se il est a pié et il n'est franc, il doit i esterllinc ; chascun cheval, ii esterllins ; le sommier, xii esterllincz ; le sac a troussel derriere l'omme ou la malle, iiii esterllins ; et acquitera le cheval son seigneur et le sergent qui le maine. Se aucun va en Engleterre a pié, il n'en doit riens ; se il maine cheval, il doit du seul cheval, iii d. ; du sommier, xii t. ; du sac a troussel ou de la malle, iiii d. Le marchant qui a avec soy ses marchandises ou qui atant leur venue, ou cellui qui les suit, quant ilz sont departis de la ville, ou quant on les amaine a la ville, il ne doit riens pour sa personne, ne pour sa mesgnie, ne pour son cheval, a son user. Et se il a cheval en entente de vendre, il doit du cheval en venant d'Engleterre ii esterllins, et se il va en Engleterre, iii d. t.
Item, il est assavoir que de toutes ces choses devant dites, en venant ou alant en Engleterre, sont quittes et exemps tous moingnes, iceulx qui portent regulier habit, du fleuve de Eu jusques au fleuve d'Alenchon, et toutes personnes privilegeez, se ilz ne sont marchans et de marchandises n'on, ou d'aucunes fermes.
Item, ensement sont quittez le mareschal et ceulz de sa table, les hes de Saint Vallery, et sont tenus a venir as plés monseigneur l'archevesque, si comme les chevaliers de Belleville, de Braquemont, de Briquegny, du Pont Trencart, de Encourt, de Maronmesnil, de Sauqueville, d'Offranville, de Saint Denis de Haquevont, de Hotot, de Bernesaut, le chembellenc de Tranquerville.
Item, ceulz qui demeurent dedens les murs de Rouen anciens, se il ont ***^aUn mot a été effacé, il s'agit peut être de demouré ; B : Se ilz ont par an et par jour demouré dedans les vieulx murs. par an et par jour dedens les vieulx murs et portes, tant de marchandises que aultrement, moyennent la coustume cy dessus escripte faisant mencion d'iceulx.