Autre coustume comment lesdis bouchers doivent vendre leurs chars.

Il est assavoir que lesdiz bouchers ne pevent ne doivent, selon les coustumes anciennes, vendre leur char le dimanche jusques a la grant messe, mais pour pluseurs raisons qui ad ce ont meu les justices de monseigneur, a present ilz vendent, des sy matin dudit jour que ilz leur plest, se elle a esté visitee par les jurés.

Item, ilz ne pevent vendre leurdite char le jour que elle est tuee, se n'est par la licence des gens de monseigneur, excepté le lundi aprés la veue faite par lesdiz jurés pour ce que ilz ne tuent, ne ne pevent tuer char le dimanche, se n'est par la licence des gens de monseigneur.

Item, iceulz bouchers ne pevent vendre veaulx, aigneaulx, chevreaux ne aultres bestez menuez devant que ilz ayent xv jours passez.

Item, ilz ne pevent vendre a Dieppe chars tueez hors de ladite ville. Item, ne pevent vendre bestez tueez qui soient maladez, ne chars corrumpuez. Et si font le contraire ilz en doivent estre en l'amande et lesdites chars estre arssez par le commandement de justice.

Item, ilz ne pevent ne doivent tuer leurs bestes en la rue, ne geter aucun sang ne autre ordure.

Et est assavoir que se lesdiz bouchers font le contraire des choses dessusdites ou d'aucunes d'icelles, ilz sont tenus de faire amende par devant la justice de monseigneur.

Et est assavoir que sur le regart de ladite boucherie et des choses dessusdites, doit avoir des plus suffisant bouchers d'icelle ville qui sur ce soient jurez, et pevent et doivent estre chagez a la volonté des gens de monseigneur, estans en la viconté.