La coustume du fouage et la maniere du cueillir.

Il est assavoir que tout le fouage de Dieppe, du Polet, de Caudecote, Jenval, Espinoy et Bouteillez est et appartient a monseigneur de Rouen de tous ceulz qui demeurent en sa haulte justice, et se doit cueillir et lever de iii ans en iii ans, sur chascun feu, xii d., excepté gens d'Eglise, clers vivant clergeaument, gentilzhommes ou tenans menbrez de haubert et gens qui demeurent en franche omosnes ou franc lieu qui dudit fouage sont frans et n'en doivent rien, sy comme plus aplain est contenu ou coustumier de Normendie. Item, tous vallez et meschinez servans et non mariez qui tiennent leur mesnage, se ilz ont meubles a la valeur de la somme contenue oudit coustumier, c'est assavoir de xx s., doivent chascun xii d., se ilz n'ont autre tiltre parquoy ilz en doivent estre quittez. Item, chascune femme veufve qui a de meuble vaillant xl s., et de mains, neant. Et se elle a ii robez, la seconde robe doit estre comptee en meuble. Quant une femme vuefve et ses enffans sont manans ensembles, et les enffans n'ayent pas parti, la femme paiera le fouage se elle a xl s. vaillant en sa partie, et l'aisné des enffans paiera le fouage comme cellui qui tient feu et lieu car la reseantize est en son nom. Et se iceulz enffans ont parti, et chascun a xx s. de meubles, chascun paiera le fouage. Et se eulz rassemblent ensemble leurs chastelx aprés ce que eulz aroient parti, ilz paieront le fouage, tant fust ce que ilz manissent ensembles. Et se i pere est vevier et il est avec les enffans, tant ait grant chastel, il ne paiera que un seul fouage, car les enffans ne pevent partir a luy. Et se un homme a marié son filz et ilz sont a un feu, a une viande et a un pain, et leur meuble soit tout mellé, ilz ne {Fol. 9v}paieront que un fouage. Se un homme a une femme, soient non mariez et ayent pere, et l'omme et la femme demeurent ensembles, tenans feu et lieu, chascun d'eulz paiera fouage.