[Premierement]

Premierement, tous les reseans es fiez du Temple et de l'Ospital. Tous les reseans de Rouen dedens les principaulx anciennes portes, et les autres, non. Les reseans de Bretueil et de Vernueil et pluseurs du fieu de Bretueil, manans en autre lieu, si comme ceulx de Breteville, et les resseans de la Bouteillerie au seigneur de Basqueville, lors resseans es fiefz de la Magdalaine de Rouen anchiennement. Les resseans en l'omosne de la maladerie d'Arques, vers Grouchet. Item, pluseurs manans en pluseurs fiefz comme appartenant par lettres royaulx a ladite viconté, dont a present n'est fait aucune mencion es vieux registres. Item, tous ceulz de Braquemont, de Caudecote, de Jenval. Item, tous les resseans d'Appeville par decha le pont, et par la raison de ladite franchise, doivent ystre au cry de haro tous les venans de Dieppe suyvans aucun malfaicteurs et doivent aidier a detenir leur malfaitteur, sique a la moitié du pont de ladite ville, et sont tenus a rendre lez a la viconté de Dieppe. Item, ils sont tenus a arrester, s'il en sont requis, tous ceulz qui aportent la coustume de Dyeppe, et est assavoir que combien qu'ilz soient frans a la viconté pour leurs marchandises, sy doivent il coustume a l'issue de la ville selon ce que acoustumé est a paier au droit du barrage. Item, ont acoustumé generalement estre frans a Dieppe, a la viconté et yssue de la ville, tous manans en franques omosnes et toutes gens de religion dont il appartient deuement. Item, audit Dieppe sont frans toutes personnes de sainte Eglise privilegez. Item, sont frans audit Dieppe, tant a la viconté comme a l'issue de la ville, toutes gens de sainte Eglise et tous ceulz qui tiengnent noblement, comme a dire menbres de haubert, est assavoir des choses qui couvent a user en leurs hostieux. Et se ilz sont marchans de quelque estat qu'ilz soient, ilz doivent coustume selon ce que ilz portent ou font porter marchandement. Item, sont frans tous les resseans es fiefs et masures assiz a Dieppe qui ensuivent. Et combien que ilz soient frans en la viconté tant d'acquis de mer comme d'autres choses marchandement, sy doivent il yssir au cry de haro et comparoir a ladite viconté es plez es quieux ilz soient convenus. Et premierement, les resseans ou fief nommé Alain Poulart, au Polet, oultre l'eaue. Item, le fief aux mallades de Jenval contenant pluseurs masures a eulx {Fol. 5}donneez en leur ancienne fondacion. Item, deux masures qui furent a l'eglise de l'abbé et couvent de Foucarmont. Item, le fief au seigneur d'Estouteville, tant a la viconté comme a l'issue de la bare et du bastel. Item, la masure qui fu au moustier de Mortemer. Item, la masure et fief du prieur de Leaue en Angleterre. Item, toutes les masures du moustier de Conches anciennement donneez. Item, les masures et fiefs du seigneur de Basqueville assizes en ladite ville. Et combien que aucunes en soient assiz en la Grant Rue, elles ne sont point franches a l'issue par derriere, fors jusques aux vieulx murs anciens de la ville qui vont de la halle au blé droit a l'ospital, lesquelles sont a present messire Robert d'Espreville, prestre, et Henrry Loutrel. Item, sont franches pluseurs autres masures du fief dudit seigneur a cause de sa franche Bouteillerie. Item, les masures de Belle Emcombre anciennes. Item, les masures de la Magdelaine de Rouen anciennes. Item, le fief nommé l'Acre Rousselin. Item, la masure qui fu Gautier Cauchie et aprés Jehan Cailletot. Item, le fief nommé Alain Poulart qui contient a present la maison ou est de present la recepte de la viconté et les maisons qui sont a present Colin Nepveu et Guillaume Godoul. Item, la masure qui fu Gautier le Cangeur ou souloit estre l'offevrerie. Item, la masure qui fu Gautier Lefevre. Item, la masure qui fu Martin Cailletot, laquelle il tenoit par sergenterie pour herberger les gens alans et venans d'Angleterre et pour leur donner conduit jusques aux bornez de l'issue des terres de mondit seigneur. Item, la masure du conte de Dreux a la Grant Rue. Item, la masure et fief nommé le fief Guillaume Crespin, devant l'eglise Saint Jacque. Et est assavoir que les manans ou dit fief doivent au seigneur dudit fief, chascun an, le jour^aRépétition de le jour. de la Tiphaine aprés disner, aporter a ladite viconté iii testes de porc crevez et en chascune une pomme en la gueulle, et v s. en une tasse d'argent couvers de blanches touaillez, et mettre sur l'estal de la recepte, et dire au recepveur : « Nous faisons hommage a monseigneur de Rouen a cause du fief Crespin », pour joir de la franchise dudit fief par representant ce que dessus est dit. Et doivent avoir, pour aporter ledit present, ung menestrel. Et aprés ainssy dit et fait, vont porter les choses dessusdites a cellui dont le fief est tenu. Item, la masure de Beaubec en la rue de Couppe Quesne. ^bLe texte suivant jusqu'à Beaubec est signalé par un astérisque et ajouté en bas de page.Item, tous les reseans en la terre de chappitre de Rouen a Neufville et au Polet. Et aussi les manans es fiefz de l'abbaye de Beaubec. Et est assavoir que tous les manans esdites masures et fiefz dessusdites n'ont acquis franchises pour raison d'icelles jusques ad ce que ilz y aient demouré i an et i jour. Et est assavoir que en Normandie a pluseurs fiefz frans tant d'Eglise comme d'autres seigneurs, dont n'est faite cy dessus aucune mencion pour l'ingnorance des noms d'iceulz, dont les manans sont frans a Dieppe de leurs marchandisez quelconquez a eulz appartenant sanz compaignie, comme ceulz de Dieppe et autres frans. Et ont acoustumé et monstrer a la viconté lettres patentes ou coppie des chartres desdites franchises. Et {Fol. 5v}pour ce, en ont acoustumé de en joir, et pour ce que mieulx soit creu la verité des franchises et masures dessus escriptes et autres, dont on a peu avoir congnoissance, cy aprés en trouverés les coppies des chartres des franchises et libertés des lieux dessusdiz.

Autres franchises a pescheurs pour les lieux ensuivens.

Il est assavoir que au port de Dieppe ont acoustumé a venir certains maistres menans nefz appartenans aux seigneurs cy aprés nommés, a cause de leurs eglises et terres, lesquelles nefs sont toutes franches d'acquit a la viconté sur pescaille ou autres chose. Mais ce s'est pescaille ou aultre chose^cou aultre chose écrit en interligne., ils doivent prendre ou faire prendre congé de descarcher leurs pescailles, avant que riens en puissent oster. Et se ilz font le contraire, se que mis aront hors, doit estre forfait et acquis a monseigneur, comme devant est dit d'autres marchandises. Et est assavoir que tout l'acquit desdites nefz doit estre receu par les mains de monseigneur aussi comme des coustumiers. Et aprés leur est tout plain rendu et paié par le recepveur, aprés ce que iceulz maistres ont suffisament monstré par lettres patentes que ilz mainent lesdites nefz sans retenir xe ne autre droit de l'acquit desdites nefz, et n'en doivent chascun avoir que une, son ainsy franche. Desquelz seigneurs ayent lesdites nefz, les noms ensuivent. Premierment, l'abbé et couvent de Fescamp, une nef ; l'abbé du Vallasse, une nef ; l'abbé de Saint Wandrille, une nef ; le prieur du Pré lez Rouen, une nef ; le conte de Longueville, le seigneur d'Estouteville et le seigneur de Basqueville, une nef chacun^dchacun écrit en interligne.. Et se ilz n'ont nulle nefz, ce ont il acoustumé de [bailler leur droict a ung pescheur qui aura le droict dessusdict].

Autres franchises.

Il est assavoir que a Dieppe a certains fiefz appartenans aux religieux abbé et couvent de Conches, ouquel demeure a present Guilbert du Cellier, lequel puet avoir par mer nefz toutes franches sanz en recepvoir par monseigneur ne ses gens aucun droit, et se doit acquitter et faire par la maniere que dessus est escript en la desclaracion de franches nefz cy dessus escriptes. Et ja pieça en ce fu mis empeschement, lequel empeschement a esté mis hors et a delivré par mondit seigneur et son conseil en l'an de grace mil ccc iiiixx et onze comme cy aprés apperera par la coppie des lettres sur ce faitez.

Autres franchises.

Il est assavoir que tous les mareschaulx fevrés des villes cy aprés desclairées, usans fer en leurs forges, estans es mettes de la guide d'Arcques sont frans a la viconté de Dieppe de tout le fer et assier emportans de ladite ville pour user comme dit est. Et de ce font certaine redevance au roy nostre seigneur a Arquez, si comme ilz dient. Et est assavoir que de nulle autre chose, ilz ne sont frans, se n'est par raison d'aucune autre franchise ou privilege ; et combien que ilz soient frans a la viconté, si doivent il acquis dudit fer a l'issue de la ville sy comme tousjours a esté accoustumé, desquelles villes les noms ensuivent. Premierement, Arques, Archelles, Montigny, Saint Aubin le Caux, Martin Eglise.

{Fol. 6}Cy ensuivent les charges deuez sur la recepte de Dieppe aux eglises, religieux et personnes ensuivant.

Premierement, aux religieux, abbé et couvent de Notre Dame de Bon Port, par composicion ja pieça faite, pour cent mars d'esterllins que ils soulloient prendre sur ladite recepte, pour lesquelz a present leur sont poiez chascun an a deux termes iic lxvi l. xiii s. iiii d. Et est assavoir, vixx xiii l. vi s. viii d. a la Saint Michel et Pasques.

Item, a l'abbé et couvent de Saint Wandrille, lx l. chacun an aux termes dessusdiz, a chacun terme, xxx l.

Item, a l'abbé et couvent de Ponteigny de l'ordre de Chitiaux, chascun an, pour x milliers de harenc qu'ilz soulloient prendre au terme Saint Andrieu, dont par composicion pieça faite, leurs sont paiez chacun an au terme x l.

Item, aux religieux chartreux du Val de Dieu au Perche, chascun an au terme de la Candeleur, iim de harenc sor tel comme il noe en la mer.

Item, au prieur de la prieuré du Mont aux Malades lez Rouen, chascun an auxdits terme, xl s. t. pour vim de harenc sor.

Item, aux malades de l'ostel de Jenval sur Dieppe, chascun an a iiii termes, c et l l. livrez tournois. C'est assavoir Noel, Pasques, Saint Jehan et Saint Michel. Laquelle some leur est deue par composicion pieça faite entre un archevesque de Rouen et les malades et gouverneurs d'icellui hostel a cause du xe des poissons venans a Dieppe lonctemps a^eUn deuxième a est écrit en interligne. a eulz appartenans.

Item, au chappellan de la chapelle Saint Anne en l'eglise de Rouen, chascun an, xx l. aux iiii termes dessusdis. Lesquelz xx l. sont assiz sur la revenue du batel passeur de Dieppe, si comme il apparait par certains registres.

Item, au curé de l'eglise de Crau[dalle] de Alihermont, chascun an, a prendre sur la revenue dudit batel, xv l. t. a deux termes. C'est assavoir Saint Michel et Noel comme apparait par ledit registre.

Item, a l'abbé et couvent de l'eglise de Beaubec, chascun an au terme Saint Michel, v s.

Item, est assavoir que toute la recepte faite par monseigneur venant a Dieppe et Bouteilles, les charges dessusdites, gages d'officiers, mises communes, ouvrages et repparacions paiee, le xe d. en appartient et est deu a messeigneurs doien et chappitre de l'eglise de Rouen.

Et est assavoir que toutes les charges, rentes et reddevances dessusdites se doivent recepvoir par les dessusdiz ou leurs gens a ladite recepte de Dieppe, sans ce que monseigneur soit tenu de le faire porter autre lieu se il ne luy plest. Et viennent les dessusdis querir lesdites sommes audit Dieppe a leurs [despens].