Saint Michel.
Autre coustume generale a Dieppe nottoirement gardee par la veille Saint Michel.

Il est assavoir que de toutes marchandises venans a Dieppe et alans par mer, la coustume et acquit, selon la chose et marchandise, en appartient a monseigneur. Et doit estre le congié demandé a monseigneur a la viconté tant en deschargent comme en chargent et l'acquit enregistré. Et est assavoir que toute personne qui doit acquit comme dit est et quelque somme d'argent que ce soit, il est tenu a le paier a la viconté dedens la veille Saint Michel ou Mont de Gargan, heure de nonne prochain venant aprés le jour du congié demandé et acquit d'eu. Et est assavoir que quiconquez doit aucun acquit et il n'est paié dedans ladite veille et heure de nonne, ledit acquit se doit doubler. Est assavoir, se il doit x s., il doit estre contraint de xx s. ; et se il doit xxx s., il doit estre contraint de lx s., et sic de allis. Tousjours en paient le double du premier acquit, et ceste coustume est trés approuvee et nottoire a tous a Dieppe, et en use l'en et eschet chascune veille Saint Michel au pris, et n'y a lieu aucune franchise puis que aucun acquit est deu. Et est assavoir que a ladite veille Saint Michel, heure de nonne, tous les sergens de monseigneur a Dieppe et les courretiers de toutes marchandises doivent comparoir a la recepte de la viconté par devant le recepveur, lequel recepveur leur doit commander sur leurs seremens de aler par la ville par tous les seillers {Fol. 17}et maisons la ou ilz pevent savoir ou pourront trouver aucunes marchandises ou pescailles estranges en garde, lesquelles marchandises ou pescailles doivent estre mises en escript par iceulz sergens et courretiers et loyalement rapporter audit recepveur. La cause est pour ce que toutes icelles marchandises ou pescailles trouvez esdiz seilliers et maisons, et desquelles l'acquit ara esté une foiz paié, sy doivent il aultre acquit tout autent comme paié et aroit esté, et est deu ledit acquit pour l'annee commenchant le jour Saint Michel aprés ladite veille. Et s'il escheoit que le premier acquit ne fust paié desdites marchandises ou pescailles a ladite veille heure de nonne, ilz devroient iii acquis, est assavoir le premier et le double du premier et le tiers pour l'année avenir. Et devez savoir que se lesdites marchandises ou pescailles estoient esdiz selliers ou maisons i, ii, iii, iiii ans ou plus ou moins, ilz paieront chascun an l'acquit a monseigneur. Et en pevent les marchans estre contrains quant bon semble au recepveur chascune Saint Michel passee, et n'en sont tenuz de paier double acquit fors que pour le premier acquit, et se de icelles marchandises ou pescaillez partie estoit vendue et l'autre non, a la Saint Michel ensuivant, ilz ne paieroient acquit fors de ce que il seroit trouvé a nature.

Et pour ce que les manans a Dieppe subgez a la coustume doivent acquit de pescaille venans et alans par mer a Dieppe pour eulx seullement, et prennent le congié et doivent acquit, iceulz manans sont tenus de paier ladite veille et heure dessusdite tous leurs acquis que ilz pevent devoir desdites pescailles venans par mer et aussi de toutes marchandisez quelconques que ilz font chargier a Dieppe et mener par mer. Et se ilz font le contraire, ilz sont tenus de paier le double de tous les acquis que ilz pourroient devoir a ladite veille, et pour iceulz acquis paier nul ne puet bailler namps a ladite veille ne faire aucune concinacion, mais est chascun tenu de paier d'or ou d'argent comptent. Et ceste coustume est nottoire a tous.