[Prologue]

{Fol. 4}Cy ensuivent les coustumes et drois de la ville de Dieppe appartenans a tres reverent pere en Dieu et seigneur, monseigneur l'arcevesque de Rouen a cause de son eglise renouvelleez du temps de mon trés redoubté seigneur, monseigner Guillaume de Vienne, par la grace de Dieu, pour lors archevesque de Rouen, et extraittes de plusseurs registres vieux et anciens, tant trouvez en la viconté dudit Dieppe comme de pluseurs appartenans a pluseurs bourgoiz d'icelle ville, tous consonans a une fin en tant comme chascun d'iceulz coustumiers en contenoit. Lesquelz registres et coustumiers furent visitez et transcripz par mesire Guillaume Tieullier, prestre, lors recepveur dudit seigneur, et par le commandement d'icellui pour conservacion de lesdiz drois et son eglise, et aussi pour eviter a faire nouvelletés pour le temps a venir au puepple subget auxdites coustumes. Desquelz drois et coustumes ledit recepveur ou nom dudit seigneur comme cy aprés sera desclairé particulierement par articles, selon ce que doit la chose, a usé et veu user paisiblement quant le cas est avenu. Et aussi a eue relacion avec serement de Martin le Carpentier, servant comme clerc et garde de la boiette de la viconté d'icelle ville, par l'espace de xxiiii a xxv ans, que tous jours ainssi comme cy aprés est^aest écrit en interligne. escript, en avoit usé et veu user comme dit est. Lequel extrait fu fait et disposé en l'an de grace mil ccc iiiixx et xvi. Ad ce appellez pluseurs bourgois de ladite ville ad ce recongnoissans et concordans.