La maniere de acquiter harens marchans frais, sors ou sallés, venans a Dieppe marchandement par mer.

Il est assavoir que tous marchans, soient de Dieppe ou estrangiers, faisant venir harenc a Dieppe par mer, de quelque maniere que il soit et par quelque maniere que il viengne pour descarcher a Dieppe, se il est sallé, ilz doivent prendre congié de descharger ledit harenc avant que point en puissent oster de la nef. Et doivent lesdiz harens estre rapportés a la viconté au petit compte, c et ii pour c. Et doivent paier de coustume pour chascun lest, vi s. viii d. ; pour le millier petit, viii d. ; et se il est frec, pour le millier, ii d. Et se marchans estrangés apportent a Dieppe harens frec a cheval ou carettes, ilz doivent pour chascun millier, vixx pour c, ii d. ; mais les manans a Dieppe n'en doivent, fors prendre congié ; et de mendre nombre, prorata se il n'est franc comme dessus est dit. Et se par aventure avoient descarché dudit harenc devant ledit congé prins, tout ce que mis seroit hors, seroit forfait et acquis a monseigneur. Et par pareil, se pesqueurs ou aultres personnes ayans harens, maquereaulx, poissons marchans ou aultres marchandises quelconques estans en bateaulx ou nef, excepté poisson frec qui s'aquitte a la coustume des poissons appartenant a monseigneur, ilz mettent aucune chose hors ou descarchent desdiz vaisseaulx sanz licence de la viconté, ilz doivent perdre tout ce que mis seroit hors. Et n'en est nul homme pour quelque privilege que il ait, exempt, ne par raison de franchise.