La coustume du fouger et comment on le doit cueillir cy aprés ensuit.

Premierement, de chascun maistre de nef qui va en pesquerie de harens, de maquereaulx et poissons, tant de la ville de Dieppe et appartenances, Poireville, le Pollet, Neufville, Puis, Braquemont, Belleville, Berneval le Grant et le Petit, iiii s. l'an, aux iiii termez accoustumez a Dieppe, a chascun terme, xii d.

Item, chascun maistre de nef estranges, excepté des villes dessusdites, a chascune maree qui entre au port de Dieppe harens, maquerel, poisson, iiii d., ou harenc, maquerel ou poisson a la value.

Item, de chascune navee de blé et de tout grain, de sel, carbon, taing et aultres choses qui se mesurent, une paellee.

Item, de chascune navee de vin, i gantier des meilleurs qui vallent iiii d.

Item, de chascune navee de laigne, iiii laignez ou iiii d.

Item, de chascune aultre nef carchee d'aultres denreez qui ne se mesurent point, excepté vin, iiii d.

Item, de chascune nef qui entre au port, soit carchee ou wide, de sa volenté ou par force de temps, vendens ou nom vendens en ladite ville, iiii d.