La coustume du hallage des grains vendus a Dieppe et la maniere du cueillir.

Tous devez savoir que les mines a blé, avaine et aultres choses grains, desquelles l'en mesure a Dieppe es halles et dehors, sont et appartiennent aux mallades de Janval, et icelles doivent trouver et touteffois que il lui en fault et les doivent apporter a l'ostel de la viconté pour les faire gauger par les gens de mondit seigneur. Pour lesquelles mines, iceulx mallades ou leur fermier doivent avoir, pour chascune, {Fol. 18v}chevallee de grain mesure et de moins pourveu que il en y ait jusques a une mine, i d.

Item, chascune personne vendant grain a Dieppe, se il n'est franc par aucun privilege, doit au fermier de monseigneur a cause du hallage, pour chascune somme de grain vendu a Dieppe chascun jour de marché ou aultre jour et en quelque lieu que ce soit, i d. Et se mains d'une somme en y a, pourveu que il en y ait jusques a une mine, doit i d. Et est assavoir que esdites halles, puet avoir tant de hommes portans roulliaux pour rere les mesures plaines de grains, comme il plest a monseigneur. Et doivent iceulx rayeurs faire seremens par devant les gens de mondit seigneur l'archevesque, de loyalment raire. Et doivent avoir pour chascune somme de grain, et de moins se il monte jusques a une mine, i d. t. Et les puet l'en muer par mondit seigneur toutez fois que bon lui semble.