La maniere de faire hommes estrangez bourgoiz de Dieppe et le droit que ilz en doivent¹Commentaire
Il s'agit d'une des rubriques recopiées dans F.

Il est assavoir que du temps passé ja pieça, tout homme estranger qui vouloit demourer en ladite ville et acquerir la bourgoisie, il convenoit que il demourast en ladite ville de Deppe i an et i jour continuez, ayent feu et demourance, avant que des franchises de ladite bourgoisie il peut user. Mais pour la diminucion de la ville, ordené fu par les gens de monseigneur et les habitans de la ville ad ce concordans, que de lors en aprés, tout homme qui vouldroit demourer en ladite ville et tenir feu et lieu, seroit receu a bourgoiz aprés ce que icelle bourgoisie aroit requise suffisament au recepveur et que par bourgoiz d'icelle ville dignez {Fol. 10}de foy aroit esté tesmoingné preudomme et de conversacion honneste. Et seront, lesdis bourgoiz, tenuz a deposer de ce pas leurs seremens. Et est assavoir que du jour que ledit estranger ara fait le serement cy aprés ensuivant et paié vii s. et vi d., est assavoir v s. appartenant a la boitte de monseigneur et ii s. vi d. au recepveur pour son droit de le enregistrer es registres de la viconté et lui faire lettres de ladite bourgoisie, il puet joir et user des franchises et libertés d'icelle ville en vendant et achettant en icelle ville touteffoiz que il lui plest, et doit avoir toutes telles libertez comme les bourgoiz comuniers. Sauf que de toutes les marchandises que il fera un an et i jour ensuivant, en les revendant a Deppe ou porter hors vendre, soient venans par mer ou par terre, il doit paier acquit a monseigneur comme estranger, selon que la chose devroit acquit comme est escript ou chapitre des acquis cy aprés ensuivant.