La coustume de Bouteillez.

Il est assavoir que la ville de Bouteilles est de la seigneurie et de haulte justice de plain droit de monseigneur l'archevesque de Rouen, non obstant que en ladite ville ait pluseurs fiefz qui ne sont pas tenus de mondit seigneurs. Et est assavoir que a ladite ville de Bouteilles sont {Fol. 23v}les coustumes qui ensuivent selon les anciens registres.

Premierement, il est de coustume que chascun qui veult charger sel en nefz ou bateaulx ou terretoire et seigneurie de mondit seigneur a Bouteillez doivent demander congié aux gens ou prevost, fermier de mondit seigneur en ladite ville. Et doit chascun qui charge sel en ladite juridicion, se il n'est franc par aucune raison, pour chascun muy de sel a la mesure d'icelle ville, est assavoir xii boisseaulx pour muy, i d. t. Et ne se pevent partir dehors des mettes de ladite prevosté sans licence des gens au prevost de mondit seigneur. Et se ilz font le contraire, la nef et sel estant dedens sont forfais et acquis a mondit seigneur.

Item, chascune quartee chargee de sel doyt pour chascun muy i d. Et se ladite cartee ist hors des mettes sanz paier coustume en ladite ville comme dit est, elle doit paier amende, c'est assavoir [xviii s. t.]

Item, chascun cheval chargé de [sel] ou val de Bouteilles doit pour muy i d., et de mendre nombre jusquez a la value de iiii d. ob., i d. Et se ledit cheval s'en va hors des mettes de ladite ville, ladite coustume non paiee, il doit amendé xii s. t.

Item, chascun asne sommier chargent sel dudit val, doit paier coustume semblablement comme chevaulx, et se il fait le contraire et part sanz paier coustume, il doit amendé xxiiii s.

Item, il est assavoir que se aucun eschet en meffet de devise ou bournes de salines, il doit d'amende iii s.

Item, selon les anciens registres chascun devant rente a cause de salinez et il ne paie a terme que il le doit, il doit iii s. d'amende.

Item, chascun qui doit le reec de la fuserie de Bouteilles, n'ont paié a terme, doivent d'amende iii s.

Item, chascun devent rente a Bouteilles a mondit seigneur en bourgage et il ne paie a terme, est tenu d'amende, mais ne scet on quelle, fors que le debteur chevist de ladite amende envers les gens de mondit seigneur le mieulx que il puet. Touteffois, de rente non paiee a jour oncquez ne n'oy faire question, pour ce que tousjours ou prés a esté baillee ladite prevosté a ferme.

Item, chascun et chascune aiant saline audit val, il doit avoir boissel, lequel doit estre juste, et se il est trouvé par les gens de mondit seigneur trop grant ou trop petit, d'autent comme la grosseur d'un oeuf, il doit paier amende a mondit seigneur, c'est assavoir iii s. Lesquelx iii s. se paient sanz nul debat quant le cas eschet. Et est assavoir que il est acoustumé de gaugier chascun an lesdis boisseaux environ la feste de la nativité Saint Jehan Baptiste, et se doit crier a l'eglise le dimanche precedent.

Item, tous boulengiers portans pain a cheval a Bouteilles, se il est a denier, il doit de coustume i d. pour somme, et se il est a ii d. il doit ii d. Et se il eschet que il porte pain melleement a i d. ou a deux, il doit pour somme ii d.

{Fol. 24}Item, chascun apportant aucune chose en la ville de Bouteilles sauf que il ne vende a la valeur de v d., il doit de coustume i d. Et se ilz vendent mains en passent la ville, ilz ne doivent riens de coustume.

Item, toute personne apportant en la ville de Bouteilles aucunes derreez se il les offre a aucun de ladite ville pour vendre et il retourne par le chemin par lequel il est venu en ladite ville vende ou non, il doit coustume desdites derrees. Et se il passe oultre la ville, il n'en doit riens.

Item, est de coustume en ladite ville que nul n'est quitte pour paier maille de coustume, fors seulement l'asne portant sel et personne portant sel a son col et aussi ung mercier portant sa mercerie.

Item, est assavoir que nul de Bouteilles qui ne^ane écrit en interligne. puet porter aucune chose de ladite ville pour vendre sanz paier coustume, se ladite chose n'a creu en son heritage assiz en ladite juridicion.

Tous les manans a Bouteilles sont frans et quittez de coustume, depuis la feste de saint Pierre, premier jour d'aoust, jusques a la feste saint Michel prochain ensuivant, de tous blés cressans en leurs heritages de Bouteilles. Et de ladite feste saint Michel jusques audit jour Saint Pierre, premier jour d'aoust, ilz sont tenus de paier coustume de ce que ilz portent vendre dehors. Mais en ladite ville, en tous temps pevent vendre toutes chose l'un a l'autre sanz paier coustume et sanz faire amende.

Item, est assavoir que se les manans a Bouteilles portent vendre hors de la ville draps ou toilles, en tous temps ilz sont tenus de en paier coustume, c'est assavoir de chascune piece, i d. t.

Item, tous apportans laigne et boys ront a Dieppe et Bouteilles, excepté le bois de Jenval qui est franc, se c'est une cartee, elle doit a mondit seigneur l'archevesque chascun an une cartee de tel boiz comme sur elle est trouvé. Et se ce est ung cheval, il doit chascun an une somme de bois comme dit est. Et pevent les gens de mondit seigneur arrester lesdiz quarette ou chevaulx pour de ce estre paié, et se ce est bois dollé on n'en doit rien.

Nota.^bNota écrit en rouge dans la marge. Item, est assavoir que tous les manans a Arques, tous les hommes […]^cParchemin troué dans A, le passage n'est recopié dans aucun autre témoin. Estienne d'Arques, de Grou[…] a ceulx de Marthegny […] ne doivent point de cou[…] de sel achetté audit Bouteilles […] estoremens. Et semblablement doivent estre quitte et frans tous ceulz de Bouteilles a Arques de toutes choses appartenans a leurs salinez, et semblablement des boiz achettez a leur usage. Et se lesdis de Bouteilles achettoient les choses dessusdites audit Arques et ilz les y revendoient, ilz sont tenus de y paier laygnage, c'est assavoir au prevost et messier.

Item, est assavoir que se aucuns {Fol. 24v}achette en la ville de Bouteilles aucune chose de la valeur de iiii d. ob. pour porter hors de ladite ville, il doit coustume, est assavoir i d., et de mains, neant.

Item, est assavoir que entre Ermenchonville et Arques a certaine prarie nommee les Mares l'Archevesque, esquelz mares puet aler pestre toutes les bestes de Bouteilles ; et doivent chascune beste, soit vacque ou autre beste pessant, paier a mondit seigneur le jour de la Saint Jehan Baptiste i d. de coustume pour tout l'an. Et s'aucun est reffusant de paier ladite coustume, les gens de mondit seigneur pevent prendre lesdites bestez et mettre en parc dudit seigneur a Bouteilles, jusques ad ce que paient en soit fait. Et ne y en a nul franc selon les anciens registres.

Item, est assavoir que tous marchans de dehors la ville ayant bois ou chanvre ou terrouoir de Bouteilles puet emporter la somme de boiz pour i d. […] grain, il puet emporter chascun […] dite semenche pour i d. […] et semblablement de fevez vertes […] estrangier et garde[…] terrouoir, il puet mener […] charettee hors dudit terrouoir en paient pour chascune ii d. de coustume. Et est assavoir que selon les anciens registres, toute personne ayant vesches vertes oudit terrouoir, les puet emporter sanz poier coustume.