La coustume des moullins a eaue et a vent et la maniere comment la moulture se doit paier.

Il est assavoir que tous boulengiers, pesqueurs, marchans et estrangiers tous moulans pour l'estoremens^aLe scribe a écrit estomens mais la syllabe re est rajoutée dans la marge. Cette syllabe est écrite avec une encre différente mais dans le même style d'écriture que le reste du manuscrit. de nefz, tant de Dieppe comme estrangiers, doyvent poier de mousture le xxiiiie partie de tel grain comme ilz portent mouldre auxdiz moulins. Et est assavoir que tous boulengiers, pesqueurs et marchans voulans entrer incontinent en la mer, pevent mouldre incontinent aprés cellui que ilz treuvent moulant. Et se ilz sont pluseurs boulengiers au moulin a l'eaue, l'un ne doit pas occuper toute la maree de l'eaue, mais doit chascun d'eulz mouldre par porcion egaulment se il ce puet faire. Et semblablement, il est a entendre que ce aucun a grant quantité de blez asdiz moulins, il ne doit pas occupper ladite maree se il n'est pesqueur ou marchant voulant entrer incontinent a la mer, lesquelz pevent et doyvent mouldre par porcions durans toute la maree ; les vallez du moullin ne doyvent ne ne pevent d'aucun prendre aucun prouffit pour le avencher de mouldre et mettre autruy arriere fors par l'ordinaire, se n'est pour purger son grain ou garder ou autre service raisonnable ou se en pur don ne leur est donné.