La coustume de la voyse.

Il est assavoir que toutes les nefz et bateaulx estans ou hable de Dieppe, a quelque personne que ilz soient de ladite ville de Dieppe ou estrangiers, soit franc ou nom, qui posent entre la porte nommee a present la porte Notre Dame, devant l'ostel a present Rogier le Carpentier, jusquez au degré par la ou l'en passe au batel passeur devant la viconté de ladite ville de Dieppe, se elles sont amareez au cay, quelque poy doivent a monseigneur ou au fermier de la voize, pour chascune foiz que lesdites nefz ou bateaulx posent a ladite voize, ii d. p. Et se c'est pesquaille, se il plest au maistre de la nef, il puet bailler poisson a la value. Et se lesdites nefz ou bateaulx sont wyans, sy doivent ilz chascun ii d. p., excepté nefz et bateaulx chargez de vingz et sel, lesquelz ne doivent par les ii d. p. dessusdis. Car se aucun descharge vingz esdites {Fol. 18}mettes, il doit paier ung gantier qui vaille les ii d. p. dessus ; et se sel est deschargé d'aucunes nef ou bateaulx, le maistre ou marchant doit poier une palee de sel a telle pele comme se mesure ledit sel ; et se par aventure nefz ou bateaulx entroient esdites mettes et riens ne deschargoient, mais voulsissent en aultre port aler, ilz ne seroient tenus de paier gantier ne sel, mais pour chascune nef ou batel, pour chascune foiz, ii d. p. comme dessus est dit. Et est assavoir que toutes nefz et bateaulx soient wianz ou chargés, comme dit est, doivent ladite coustume, et n'est aucun franc de ladite coustume paier pour quelconquez raison de franchise ne pour quelque privilege que il ait d'Eglise ou temporalité. Et se aucun est refusant de paier au fermier ladite coustume, il puet prendre gage esdites nefz ou bateaulx a la valeur de son droit dessusdit, et moyennent les chosez dessusdites, ledit fermier, sy comme l'en dit, est tenu de tenir necte de pierres la place de ladite voize, afin que les nefz ou bateaulx puissent avoir bon siege sanz empirer. Et ce ay je veu faire par pluseurs annees aux fermiers d'icelle ferme, en especial a Jehan Anguelart dit Vittelu. Et quant a moy, je tieng que c'est raison.