Apres ensuit la coustume des boulengers de Dieppe et la rente que ilz font a monseigneur pour leurs estaulz.

Il est assavoir que tous les boulengiers de la ville de Dieppe qui fournient pain a revendre, doivent chascun an a monseigneur x s. aux termes de la Saint Jehan Baptiste et Noel, est assavoir a chascun terme, v s. Et s'il estoit ainsi que aucun boulenger eust poié son terme et il fourniast aprés le terme viii jours ou xv ou mains ou plus, non obstant que il ne fourniast jusquez a l'autre terme ensuivant, sy seroit il tenu a paier icellui terme ensuivant puis que entre les deux termez, il auroit fait fait de boulengerie. Et ensement doivent les boulengers vendre leur pain as halles de monseigneur et avoir chascun son estal ou il doit vendre son pain. Et doivent estre les estaulx getez et partiz ii ou iii fois ou iiii fois l'an a la requeste desdiz boulengiers pour ce que il y a de meilleurs places et estaulz l'un que l'autre pour vendre pain. Et doivent faire pain suffisant par poiz baillé par les gens de la justice de monseigneur, selon la valeur du blé. Et doit ledit pain estre pesé par jurez ad ce commis par ladite justice. Et de raison et par coustume gardee, le pain qui est trouvé insuffisant doit estre perdu et estre a la volenté de monseigneur. Et doivent faire lesdis boulengiers pain a maille, a denier, a ii d., a iiii et tousjours en doublent, et doivent faire pain si juste que ilz n'en donnent que xiii pour xii. Et se ilz font le contraire, se demeure au regart de la justice de monseigneur.