Aultre coustume contre les bourgois demourans entre les anciennes portes de Rouen.

Il est assavoir que les bourgoiz manans dedens l'enclos des anciens murs de la ville de Rouen ne pevent leurs marchandises, quellesque ilz soient estans a Dieppe, carcher en nefz ne oster de nefz, sanz licence de cellui qui garde la viconté ; et se ilz font le contraire, ilz doivent tout perdre.

Aprés, il est assavoir que les devant dis bourgois de Rouen ne pevent leurs possessions amener par mer, par eulx, au port de Dieppe, descharcher ne mettre a terre ou en maisons, mais par congié ilz les pevent carcher sur les chevaulx ou en carettes. Et se ilz les mettent a terre en rue ou en maison, de coustume ilz doivent tout perdre, ensemment fer, miel, nois, vergus, lesquelles choses les devant dis bourgois pevent vendre en la ville en quarettes, mais se ilz sont mis a terre ou a couvert, par coustume de ville, ilz doivent tout perdre.

Item, lesdis bourgois de Rouen, se ilz achettent a Dieppe harens frais, ilz ne les pevent saler ne faire saler en ladite ville, ne en la juridicion d'icelle. Et se ilz font contre ce, ilz doivent tout perdre.

Item, lesdis bourgois de Rouen ne pevent rien vendre en la ville de Dieppe qu'ilz ne forffacent tout, ne les choses qui sont en la ville, ilz ne les pevent vendre hors de la ville, se ilz n'en ont devant pris congié et paié la coustume, autressi comme se ilz fussent coustumiers. Toutesvoiez, il est acoutumé que les devant dis bourgois pevent vendre en tous temps miel, fer, noiz et vergus en carette, si comme il est devant dit.

Item, ilz pevent venir aux foires de Jenval, de Saint Jacque et de Saint Nicolas, a tout leurs marchandises et illeuc vendre, tant comme les foires dureront, si comme estrangiers.

Item, les peletiers pevent vendre en ladite ville de Dieppe leurs forreures ou {Fol. 22}leurs pennes et toute leur oeuvre de pelleterie, de la feste saint Nicolas en yver jusques au Noel.

Item, ceulz qui vendent pos d'arain et draps vieulz en tout temps, pevent vendre a Dieppe, ne n'en doivent estre denez ne destournez.

Item, il est acoustumé que ceulx de Rouen ne pevent faire attourné en aucune chose, carcher en carettes ne en nefz ou a descarcher hors des nefz, mais que de leur propre mesnie et famille. Et se ilz veullent faire contre ce, l'en dit que ilz doivent tout perdre.