Acquis de blés et aultres grains.

De chascun muy de tous grains chargés en nefz tant par les manans a Dieppe, se ilz ne sont frans, comme estrangiers, et aussi venans a Dieppe par mer, par marchans estrangés, en doit vi d. ; et de mendre nombre, prorata. Et se lesdis grains estoient mis en tonneaulx ou pippes, l'en doit pour chascun piece i d., c'est assavoir marchans estrangés alans et venans et ceulx de Dieppe emportant par mer hors de la ville. De chascune carette de tous grains aportée vendre a Dieppe, se le vendeur n'est frans, l'en doit iiii d. ; de la somme et mains jusques a la value de xii d., i d. De chascune cartee de tous grains, de la somme et de mains, comme dit est, achectee a Dieppe et porté hors par estrangés et par ceulz de Dieppe pour revendre, l'en doit xvi d. Mais se aucune personne estrange achette blé a Dieppe pour son vivre, et il jure par son serement a la recepte que il le portera a son col jusques au lieu ou il demeure, il n'en doit rien, mais seullement porter le signe de la viconté.