Autre coustume generale pour nefs entrens ou hable chargeez ou widez. Coustume pour nefz entrant ou hable.

Il est assavoir que tous ceulz qui amainent nefz par mer entrens ou hable de Dieppe de leur gré et volenté ou par fortune de tempeste, portans marchandises ou pescaille, se ilz vend partie de leurs marchandises ou pescaille ou mettent en vente en les monstrant a aucun ou les mettent a pris de vente, ja soit ce que ilz ne vendent pas toute la marchandise ou pesquaille estant en leur nef, ilz sont tenuz a acquitter et paier acquit de toutes les denrreez et pesquaille estans en leurs nefz selon l'acquit de la coustume d'icelles denreez ou pesquaillez. Semblablement, se ilz achettent en la ville aucune chose excepté boire, menger et aultres vivres, boiz et charbon et aultres choses neccessaires pour eulz gouverner en la nef, et se ilz muent un compaignon pour aultre ou prengnent un nouvel compaignon, semblablement se ilz font mettre en la nef aucune reparacion ou en icelle facent aucune chose chargier ou de icelle aucune chose deschargier, toutes les {Fol. 16v}choses, c'est assavoir marchandises ou pescaille estans esdites nefz, sont tenuez de paier acquit. Et se iceulz chargoient esdites nefz ou deschargoient d'icelles aucune chose sanz licence de la viconté, ce qui chargé y seroit ou seroit deschargé, seroit forffait et acquis a monseigneur, comme dessus est escript en la coustume faisant mencion. Et s'il est ainsi que les maistres desdites nefz n'ayent fait aucune des choses dessusdites, ilz ne sont tenus d'acquiter ne paier acquit des marchandises ou pescailles estans en leurs nefz. Et de ce sont tenus de faire seremens a la garde de la viconté, et ledit serement fait, ilz sont tenus de pour chascune nef entrans ou dit hable par quelle maniere que ce soit, de paier pour le siege, iiii d. se aucunement ont aucun poy just ou dit port. Et en ce sont comprisez les nefz ou bastiaulz apportans mollez et oestrez audit port, et en ce lesquelles mollez et oestres [ne doivent] point d'acquit, fors demander congié de vendre et paier le siege de chascune nef [iiii d.,] comme dit est. Mais s'il est ainsy que aucuns maistres de nefs estans audit port ayent en leurs nefz marchandises ou pescailles voulans aler en aultre port, et par aucune aventure la de^ade écrit en interligne. fortune de temps, sont arrestez et ne puissent partir dudit port et argent leur est failli, par congié de la garde de la viconté, ilz pevent vendre les denreez ou pescailles estans en leurs nefz en paient l'acquit de ce que mis seroit hors, et ne puet nul estranger lever sa nef sans congé.