Autre coustume generale en toute la juridicion de Dieppe pour choses vendues deux fois.

Tous devez savoir que toutes choses vendues une foiz en la juridicion de Dieppe, soit par les manans en icelle ou estrangiers dont le contrault et marché seroit parfait et acordé, et aprés cellui qui l'aroit vendue le revendoit a ung autre, la chose ainsi vendue doit estre forfaite et acquise a monseigneur l'archevesque. Et n'y a point d'autre amende se aultre cas n'y est meslé. Et de ceste coustume ay veu user paisiblement quant le cas est avenu, et est escheu pluseurs fois, et par especial de Jehan du Gardin, de Bouteilles et pluseurs ses compaignons revendi sel a Robin Feron de Dieppe que ilz avoient vendu a Girardin d'Escouchi, facteur de Gille de Clamechi en l'an iiiixx et xiii.