La maniere de l'acquit des selletans.

Il est assavoir que il y a poissons qui resemblent harens, si comme sellerans et espies, dont pescheurs et marchans ne doivent riens venant de la mer se ilz ne sont sallés, mais se ilz sont sallez, tous ceulz qui les portent hors de Dieppe, se ilz ne sont frans, doivent pour tous les chevaulx qui portent lesdiz poissons, tant seulement i d. Et se il y a pluseurs chevalx qui soient a pluseurs personnes melleement, chascune personne doit pour sa part i d. Et est assavoir que se lesdiz poissons sont apportés par pescheurs de la mer en ladite ville, melleement avecquez harenc frec, lesdiz poissons doivent estre acquittez et comptés comme harenc frec, et de ce paier coustume, comme dit est dessus, en l'acquit de harenc venu en main de pesqueurs. Et se pesqueurs apportent lesdiz poissons sanz y avoir aucun harenc, ilz n'en doivent rien, mais sont tenus de venir quatre, c'est assavoir le maistre et iii de ses maronneaulx, jurer devant la garde de la viconté que oncques en leur pesquerie ne virent harenc. Et ceste coustume est bien observee et gardee.