Copie contre lesdiz bourgois.

A honnorables hommes les bailli et bourgois de Dieppe ou a leur lieutenant ou a chascun d'eulz, si comme a lui appartendra, Jacques Filleul, maire de Rouen, salut et dilection. Sire Jaques de Lieur, capitaine de ladite ville de Rouen, et Ricart Oger, bourgois d'icelle, sont venus devers nous et nous ont donné a entendre que ilz ont grant quantité de blé que ilz faisoient venir par mer de Flandres a Rouen, en la nef de Jehan Petart, lequel blé s'est eschauffé en ladite nef tellement que se il n'estoit descendu et mis en grenier, il seroit emperil de perdre et d'estre mal mis. Pourquoy nous vous prions et requerons tant comme plus povons que, sanz prejudice des privileges et anciennez usages de ladite ville de Dieppe, lesquelx nous ne vouldrions corrumpre ne diminuer en aucune maniere, vous icelluy blé souffrés et laissiez estre deschargié et descendu et mis en grenier en ladite ville de Dieppe affin que il ne soit perdu ne gasté par deffault de descharge. Et de ce vous plaise tant faire pour nous chascun en droit soy comme vous vouldriez que nous feissions pour vous en cas semblable ou greigneur, ce que nous ferions trés volentiers. Donné a Rouen soubz le seel de ladite mairie, le second jour de novembre, l'an mil ccc soizante quatre. Et est l'original de ceste lettre devers le clerc de la ville. Et fu donné congié aux dessusdis en la presence des bourgoiz cy dessous nommés : maistre Ancel Loutrel, Jehan du Boscrohart, Ancel Loutrel, Jaques Manessier, Gilles le Peletier, Jaques Botin, Robert Leroux, Guillaume le Franc, Ricart de Caudecote, Colart James, Mahieu Maillart, Rogier Eude, Baudouin Eude, Raoul de Witebie, Mahieu Daniel et Mahieu de Bruville.