Autre coustume contre marchans estrangiers pour achetter et vendre a Dieppe.

Il est vray que en la ville de Dieppe, tous marchans estrangiers pevent achetter telles denrreez comme il leur plest pour porter hors de ladite ville en paient l'acquit de monseigneur, mais en ladite ville iceulx marchans ne pevent revendre icelles derrees que il ne soit aprés ung an et ung jour, se n'est par la licence de cellui qui garde la recepte de la viconté, et se aucun fait le contraire, la chose revendue doit estre forfaite et acquise a mondit seigneur. Se aucuns estrangers estans en ladite ville changent leurs chevaulx les ungz aux aultrez et {Fol. 21v}depuis aucun d'iceulx revend ou rechange le cheval que il aura changé, il doit estre forfait et acquit a mondit seigneur ; et semblablement d'autres marchandises qui se changeroient et aprés se revendroient en ladite ville dedens l'an. Et ceste coustume est nottoire et aprouvee.