Pour tous les manans a Dieppe i ans et i jour.

Tous les manans a Dieppe qui ont fait leur reseandise en franc lieu ou non franc un an et un jour, aportant aucune chose en la ville de Dieppe ou par terre ou par mer, ilz ne doivent riens de coustume, excepté les pescailles qui sont apporteez par mer, desquelz et les reseans et les estrangiers sont tenus de paier coustume, se ce ne sont aucunez choses de la devant dite franchise. Et se il est ainsi que ilz soient aporteez par terre par aucun residant, ilz ne doivent riens de ladite pescaille, fors prendre congié du deschargier.

Item, lesdiz manans a Dieppe ne doivent aucune chose de quelconques marchandise a eulx appartenant venant par terre, ne prendre congié de descarcher en leurs hosteulx se ne sont de vings, servoises et aultres beuvrages ^aLe texte qui suit jusqu'à riens est signalé par un astérisque et écrit en bas de page.et toutes manieres de poissons venans a carrettes et chevaulx, et n'en doivent riens. Et aussi de merrien a ouvrer, chargiés en cars et carettes, mais de ce ont acoustumé a prendre congié, et n'en doivent riens, pourtant que il soit venu a leurs coust et coustages.

Item, s'il est ainsi que lez manans a Dieppe achatent aucune chose hors de la ville, ou ilz prennent aucune ferme, ou ilz baillent leurs terres a chenssez ou a ferme, et les blés ou aucune chose soit envoyé aux manans de Dieppe pour la raison devant dite aux perilz et aux coux du vendant et du fremier ou du tenant leurs terres a chense ou d'aucun autre estrange, de toutes telx choses on doit coustume. Et s'il est ainsi que les manans en la ville les fachent amener a leurs despens ou a leurs perilz, ilz ne doivent riens de coustume.