Acquit de chevaulx, mulles et asnes.

Tu dois savoir que de chascun cheval vendu et achetté a Dieppe par estrangiers, l'en doit iiii d. Est assavoir, ii d. du vendeur et ii d. de l'achetteur, de telle monnoye comme il est vendu. Et se il avient que ung manant a Dieppe vende ung cheval ou achette a un estrangier, il n'en doit rien, mais doit l'estrangier ii d. pour la vendue ou achat dudit cheval. Et se il avient que ii estrangiers changent leurs chevaulx l'un a l'autre, chascun doit pour le change iiii d., c'est assavoir, ii d. pour le cheval baillé et ii d. pour le cheval pris. Et se il avient que un estrangier change a un manant a Dieppe, icellui manant a Dieppe, se il est bourgoys suranné, ne doit rien, mais doit l'estrangier iiii d., comme dit est. Et est assavoir que les chevaulx vendue ou changez, tant par ceulx de Dieppe comme estrangiez, se doivent acquiter le propre jour que ilz sont vendus ou changiez, se ce est fait de jour, et se c'est fait de nuit, la nuit se doit acquitter ou aultrement ilz doivent estre acquis a mondit seigneur.
De chascun mullet ou asne vendu, changé comme dit est, l'en doit ii d. par la maniere devant dite.
Et est assavoir que mullet et asne ne doit que la moitié de l'acquis d'un cheval, quoy que il porte ou soit vendu ou changié.