{Fol. 29}Acquit de pluseurs aultres peaulx.

De chascun cent, au petit compte, de peaulx de congnins, quevriaulx, lievres, cas privés, aygneaulx, brebis, moutons et bouqz, l'en doit iiii d., et de mendre nombre, prorata.

De la xiie et mains, i d., se la marchandise vault xii d.

De la xiine de cas sauvages, gouppiz, genestes et leurs semblable l'en doit i d., et aussi de mains, se elles valent xii d.

De chascun timbre qui contient xl peaulx de ver, de erminez, de gris et de diverses peaulx, se ilz sont par timbres, l'en doit iiii d.

Du petit chent desdites peaulx, se ilz sont par chens, l'en on doit estimer par timbrez, et de la timbre comme dessus.
De chascune pel de loutre, l'en doit i d.

De chascun herichon et penne de aygneaulx, de moutons et de quevreaulx, vendue ou achettee en la ville de Dieppe par estrangés et portee hors et vendue par les manans a Dieppe, se ilz ne sont frans, i d.

De chascune penne ou plichon de congnins, de quevreaul, de lievres, de cas sauvages, de gouppis et tellez chose par la maniere que dessus est escript, l'en doit ii d.

D'une penne ou plichon de vair, de genestes, de gris, de telz semblables, par la maniere que dit est, vendus ou achettez, l'en doit iiii d.

D'un vestir de congnins vendu ou achetté comme dit est, l'en doit v d. ; du petit chent, iiii d. ; du demic, ii d. ; du quarteron, i d. ; et de mendre nombre, i d. jusques a la valeur de xii d.

Item, est assavoir que il y a pluseurs choses a acquiter qui ne sont pas toutes escriptez en cest coustumier, et pour est il assavoir que de toutes choses acquitablez qui vallent xii d., l'en doit i d., et de mains, neant. Neantmoins, ceulz qui le portent doivent prendre congié a la viconté et dire combien la chose a cousté.