Cy aprés ensuivent les drois appartenans a monseigneur de Rouen a cause de la haute justice a cueillir et lever par le excecuteur d'icelle, est assavoir le bourrel demourant en la ville de Dieppe¹Commentaire
Il s'agit d'une des deux rubriques recopiées dans le manuscrit E.

Premierement, il est assavoir que de toutes les personnes estrangez vendans les choses a Dieppe, cy aprés desclairees, se ilz ne sont frans, il doit prendre et lever ce qui ensuit.
C'est assavoir :
De chascune somme de poires ou de pommes mis en vente ou marché, v pommes ou poires.
De chascune somme de poireaux, une glenne.
De chascune somme de grain mis en vente, une cueilleree.
De chascune somme d'oignons, v oygnons.
De chascune somme de noye, une pongnee.
De chascune pengneree de prunez et ainsi verjus, cherisez et aultres fruis, une poignee.
De xiii oeufz et de plus en ung pengniez, ung oeuf ; et de mains, rien.
De chascune navee de vins, quelque personne que ce soit, i gantier.
De chascune somme de cresson, povreez et aultres telles choses, une pongnee.
De chascune nef pesqueur ou batel, pour chascune maree qu'ilz aportent poisson au hable, ii d. p. ou pescaille a la vallue.
De chascune nef venante au hable par mer apportans marchandises qui se livrent a mesure, une paellee.
De chascune nef apportant audit hable merrien ou autre boys par mer, ii d. p.
De chascune nef apportant laigne par mer, v laignes ou ii p.
De chascun porc pris par lui en la ville de Dieppe, sanz garde, iiii d. t.
De chascune femme commune au bordel, chascune sepmaine, v d. t.
Item, il puet prendre les mauvesez chivieres, broettez et aultres vaisseaulx de ceulx qui portent nettoieurez et ordures a la mer, se ilz ne les gettent oultre les anciens paulx fichés ou perroy de la mer, et de ce finent yceulz a lui le plus bel que ilz pevent. Et est assavoir que tous ceulx qui vendent a Dieppe les choses dessusdites ou aucunes d'icelles, se ilz sont frans comme dessus est escript, ilz ne lui doivent riens. Et moyennent les drois dessusdiz, ledit officier doit exercer et faire l'office de haulte justice a Dieppe quant [le cas] affiert par le commandement de la justice, [et ne] doit partir de Dieppe sanz congié d'icelle [justice]. Et en oultre doit nettoier la cohue et faire nette quant mestier en est. Et s'aucuns ne le veult paier des choses dessusdites, il puet prendre gage suffisant pour estre paié.