La coustume du geolage de Dieppe¹Commentaire
Il s'agit d'une des rubriques recopiées dans F.

Il est assavoir que chascune personne mis es prisons de monseigneur l'archevesque, par quelque sergent et pour quelconques cause, doit au geolier pour l'entree de la prison iiii d. t., et pour l'issue d'icelle semblablement iiii d. t. Et pour chascune nuit que il demourra en la prison et couchera sur lit, il doit iiii d. t., est assavoir ii d. pour son lit et ii d. pour son geolage. Et se il ne couche point en lit, il ne doit pour chascune nuit que ii d. t. pour geolage. Et est assavoir que quiconquez est geolier, il est tenus de garder les prisonniers a ses perilz, et ne leur doit trouver aucune chose autrement que dit est, se n'est a leurs despens. Et se aucun malfaitteur prisonnier y est mis par la justice de monseigneur pour aucun cas criminel ou civil et il n'a de quoy vivre, mondit seigneur est tenu de lui trouver sa vie, est assavoir du pain et de l'eaue estans en la prison, et lui doit ledit geolier admenistrer loyalment selon ce que par justice lui est ordené, et n'est tenus de lui trouver aucune chose, se n'est de sa volenté. Item, est assavoir que ledit geolier est tenus de rendre des sommes pour lesquellez aucuns debteurs seroient mis en prison et baillés en garde, en cas que par sa faulte ilz se partiroient de la prison. Et se par aucune aventure, aucun prisonnier estant en prison en cas criminel {Fol. 23}ou pour aucun autre cas, brisoit la prison et de ycelle se partoit sanz licence dudit geolier, et icellui geolier n'en doit estre aucunement chargé, pourveu touteffoiz que le brisage d'icelle prison apparé et que de riens n'y ait de la coulpe dudit geolier et de ses gens.