Autre coustume pour toutes gens demourans a Deppe¹Commentaire
Il s'agit d'une des rubriques recopiées dans F.

Il est assavoir que nul ne doit par droit faire fumier sur le pavement an aucune rue. Et se aucun y fait mettre fiens, selon les anciens registres, il le doit faire oster lendemain.

Item, toutes les masures de Dieppe doivent estre closez sur rue pour eviter aux agaiz qui de nuit y pourroient estre fais et les maulx perpetrez. Et s'aucune y soit sanz poccesseur, monseigneur la puet faire prendre en sa main par deffaulte de hoir et bailler par cry pour rente a son prouffit, et de ce faire decret par sa justice. Et ainsi a esté pluseurs foiz fait.

Item, nulz ne doit avoir pors par ville, ne aultre lieu, se ilz ne sont encloz. Et se aucun a pors encloz, l'abitacion ou ilz sont ne doit pas estre prés de la rue mais deriere es hostieux afin de eviter a la pueur d'iceulz.

Item, nul ne puet faire estal a sa fenestre estandue sur le pavement qui de large de plus de pié et demy ait.

Item, nulz ne puet ne ne doit geter par jour par ses fenestres en la rue, soit nette chose ou orde. Et par especial de nuit, nul n'y doit geter orde chose.

Item, selon la coustume, chascun est tenu de faire net devant son huys le pavement chascune sepmaine une foys. Et est assavoir, que quant il est grant habundance de pluie en tant que l'eaue quert parmi les ruez, chascun doit purger le pavement devant son huis, et a donc doivent tous les voisins aydier l'un a l'autre a bouter aval par la rue, jusques a la xe maison l'un de l'autre et de ce m'atens ad ce que fait en est.

Item, est assavoir que pour garder et observer les coustumes dessusdites, les rues de Deppe doivent estre limiteez selon ce que de sergens y a pour faire lesdites ruez tenir nettes et lesdites coustumes garder.