{Fol. 8v}La coustume des estaulz a poissonniers et a poissonnieres et la maniere de cueillir la rente que ilz doivent.

Il est assavoir que il soulloit avoir xvi estaulx aux halles des poissonniers et y en povoit avoir plus, se il plaisoit a monseigneur. Et a present ne y en a pas tant, pour la diminucion de la ville. Et pour espargner a la fragilité de povres gens qui a present tiennent les diz estaulx, poy ou neant vendent esdites halles, mais vendent en petites eschoppes en la ruette qui maine du quarfour de la Grant Rue au quarfour du puis de la poissonnerie et environ, et non obstant que ilz ne vendent pas esdites halles, laquelle chose faire doivent se il plest aux gens de monseigneur. Sy doivent il, comme cy aprés sera dit, paier estallage, c'est assavoir xiii s. iiii d. chascun an, moitié a la Saint Jehan Baptiste et moitié a Noel. Et quiconquez veult revendre poisson a ladite ville, il convient que il tiengne un estal, et ne peut acompaigner avecquez lui que ii personnes au plus pour lui aidier a paier ledit estal, ne ne puet autre vendre poisson avecquez lui. Et pour ce que desdiz poissonniers en y a de povre estat et qui trop seroient grevez de paier un estal appareux, le recepveur de la viconté doit savoir l'estat desdiz poissonniers et les puet deuement a sa conscience acompaigner ensembles un, deux ou trois personnes, tous paier i estal. Et en ce doivent estre contrains aucunes personnes vendans poissons frais parmi la ville nommez l'ouverressez ou au moins de contribuer avecquez les tenans desdiz estaulx selon leur possibilité. Et ainsi a l'en acoustumé de en user et a present en use l'en et n'y a aucune franchise aucunement, lieu ne ny vault.