La maniere de l'acquit de harens venans a Dieppe es mains des pesqueurs par tout l'an.

Il est assavoir, se aucuns pesqueurs aportent a Dieppe harens frais ou sallés de leur pesquerie, ainsi que ilz ne voisent a aultres port en mettant leur harenc {Fol. 26}a terre pour saller, ilz doivent poier de coustume pour iiiim iiiic l harens la value d'un millier a la meilleur vente et de plus aultretant. Se ilz en avoient mains de iiiim iiiic l harens, ilz doivent le xe de tout leur harenc comme devant est dit. Et est la coustume telle au port oultre l'eaue comme de la ville de Dieppe.

Item, il est assavoir que se pesqueurs ont harenc pesquié et ilz vont a aucun port estrange, et la font saller leur harenc et aprés l'aportent a Dieppe, ilz doivent pour chascun millier, au grant compte, ii d. Et se ilz avoient achetté harenc et mis en leurs nefz avecques le harenc de leur pesquerie ou appartenant, ilz doivent pour chascun millier au petit compte, viii d., pour ce que se est marchandise, comme apperra cy aprés et ne pevent descarcher leurs harens hors de la nef se il n'est vendu sans congé de la viconté. Et se ilz font le contraire, tout se que ilz mettront hors est acquis a monseigneur comme forfait.