Jugement pour ladite coustume.

En l'an de grace mil cc iiiixx et xvii, le dimanche et jour de {Fol. 11}Penthecoustes, fu demandé au coustumier, monseigneur l'archevesque de Rouen, aux gens pesqueurs de Boulongne, coustume de congres que ilz avoient aporté au port de Dieppe avecquez aultres poissons. Ilz dirent que ilz n'en doivent point de congrez. Sur ce, il fu demandé a Berenger Morel, a Paul Morel, Michel Agnez, Estienne Berenger, Robert Defer, quelle coustume on devoit prendre de congres. Ilz dirent ainsi que on ne devoit riens de congrez, de la Toussains jusques a la Penthecouste a nonne, se ilz ne sont pesquiez a hoc et a molinel ou se il n'est trouvé en la nef. Et de la veille de Penthecouste de nonne jusques a la Toussains, on doit la coustume de congres, en quelque maniere que il soit pris.