La coustume des poissons royaulx cy aprés ensuit.

Il est assavoir que tous poissons royaulx qui sont pris en la mer et aportez au hable au port de Dieppe, nul pesqueur qui les apporte ne les puet descarchier ne vendre en aucune maniere, jusquez a tant qu'il ait congié du recepveur ou de cellui qui garde la boitte de la viconté ou aultres des gens de monseigneurs, l'archevesque de Rouen, demourant a la viconté qui ait povoir de donner leur congié. Et se ilz font le contraire, les poissons sont forfais et acquis a monseigneur l'archevesque. Et se il plest auxdites gens de monseigneurs a lez avoir pour mondit seigneur, et les pesqueurs ou marchans ne veullent faire raison, lesdites gens de mondit seigneur les pevent faire priser par poissonniers et faire jurer que bien et loyalement ilz les priseront sanz faveur et le prendre pour monseigneur par le pris que ilz seront prisiez.