Nota des drois aux pesqueurs et marchans.

Il est assavoir que se pesqueurs estans ou hable de Dieppe achetent harenc ou aultres estoremens de vivres pour le gouvernement de leurs nefz [et detiennent] {Fol. 26v}aucun harenc de leur pesquerie pour aler en la mer pesquier, ensement se maronneaux marchans achettent aucuns vivres de boire et mengier et aultres choses pour l'estorement de leurs nefz, tous lesdiz pescheurs, maronneaux marchans n'en doivent rien, ne n'en doivent prendre nul congié de mettre en leurs nefz. Mais tous les dessusdiz et toutes aultres personnes de quelque estat que elles soient, soit d'Eglise, noble, franc, marchant ou aultre, ne pevent aucune chose mettre en aucune nef ou batel, ne charger sanz licence de la garde de la viconté. Et se ilz font le contraire, tout ce qui seroit trouvé chargé auxdites nefz sanz congé seroit forfait et acquis a monseigneur. Et se icelles nefz ou batel se partoient du hable et passoient les mettes de l'acquit de ladite viconté, portans les derreez chargeez en icellez sanz congié, icelles nefz ou bateaux seroient forfaitez et acquisez a monseigneur.