La coustume de la foire Saint Denis et la maniere de la cueillir cy aprés ensuivent.

Ladite coustume de la foire Saint Denis commenche la vigille Saint Michel a heure de nonne et fenist la veille Saint Andrieu ensuivant, et ne dure chascun an que le temps dessusdit.

Premierement, chascun tonnel et chascune piece de vin, mais que il soit lié d'osier, venant par mer et par terre par marchans estrangez, venduz par ledit temps en ladite ville, doit vi d.

Item, chascun tonnel alant hors de la ville, par ceulz de la ville ou par les estrangez, ledit temps, vi d., et autant a la viconté.

Item, chasun de ladite ville doit de la chascune piece de vin que ilz vendent a detail, ledit temps, vi d., et de chascune piece que ilz aront entamé, non obstant que tout ne soit pas vendu, puis il en ont vendu tant soit peu, ilz doivent autent que se elle fust toute vendue.

Item, chascun brasseur de ladite ville doit de chascun brassin que il brasse par ledit temps, ii d.

Item, chascun de ladite ville qui vent servoise a detail, doit de chascun baril vendu ledit temps, ii d.

Item, chascun baril de cervoise aporté en ladite ville par estranges personnes, vendu en icelle ledit temps, ii d.

Item, chascun baril portant hors, par estrangez ou par ceulz de la ville, ledit temps, ii d.

Item, chascun botier vendans denrreez, a fenestre ou a estal, par ledit temps, doit ix d.

Item, chascun eschopier de la ruette au sel et ceulz semblablement par la ville qui revendent denrrees, ix d. par ledit temps.

Item, chascune personne revendans poissons et harens a estal, a fenestres ou portant par la ville pour revendre, ix d.

Item, chascun drappier et cousturier de ladite ville revendans drap ou toille a estal ou a mesure, ix d.

Item, tous drappiers estrangés vendant drapz ou toilles, a estal ou a fenestres, par ledit temps, ix d.

Item, chascun boucher doit de chascun buef, vacque ou veel, mais que il ait peu qui soit tué par ledit temps, i d.

Item, de chascun porc, de chascun mouton et brebis, ob.