L'acquit des maquereaux frez ou sallez de Pasques jusques a la Saint Michel.

Il est assavoir de la Pasque jusquez a la Saint Michel, xii d. esterllins du millier, ou iiii s. t. selon la vente. Et il est assavoir que aux frans, on rent leur partie franche, si comme il est devant dit en l'acquit des harens. Et se comptent comme dessus est dit, et doivent prendre congié comme dit est.

Item, il est assavoir que se pesqueurs apportent maquereaulx prins a rés de harens, de la Saint Michel jusquez a la Candeleur, ilz n'en doivent riens a la viconté en argent, mais doivent iiii maquereaux paier au fermier de la coustume des poissons, ne des pires ne des meilleurs.

Item, tous maquereaulx prins as hams, a lissez ou a lingne, en quelque temps que ilz soient pris, ne doivent rien fors prendre comme, sauf que se il plest aux gens de monseigneur estans a la viconté, les pescheurs pevent estre constrains par serement se lesdiz maquereaulx ont esté pris par la maniere qui dit est. Et est assavoir {Fol. 27v}que a tous pesqueurs de maquereaulx, se ilz sont frans, en tous temps leur doit estre paié la franchise et rendue toute telle porcion et droit comme a monseigneur en appartient, excepté du xe partie, laquelle doit estre retenue pour le droit de mondit seigneur. Et se doivent en tous temps maquereaulx avaluer a l'argent et pour millier, selon les saisons cy dessus escriptes.