La coustume et ordenance des lanneurs et drapiers.

A tous ceulz qui ces lettres verront ou orront, Guillaume Caperon, lieutenant du bailli de Dieppe, salut. Comme tant de la partie de pluseurs et grant foison de tresserens de draps, qui en ladite ville estoient venus demourer de nouvel et s'estoient habituez pour ouvrer de leur mestier, que de pluseurs sages bourgois et habitans de ladite ville, nous eust esté donné a entendre que pour eschever aux grans faulcetés et mauvestiez qui povoient estre faitez et commisez en leur dit mestier, a cause et sur les ouvrages d'icellui que ilz faisoient de jour en jour et affin que icelle ville ne fust renommee de telles faulces et mauvaises oeuvrez faire, par quoy, en icellui cas, toute la drapperie de ladite ville eust esté foulee et desprisee par tous les lieux ou l'en en eust eu congnoissance, par quoy tous lesdis tiesserens et aultres qui dudit mestier de drapperie s'entremetoient que les marchans que iceulx draps faisoient faire, peussent avoir esté exilliez ou gravement dommagez et icelle ville, ville pis marchande, en quoy ensement monseigneur l'archevesque de Rouen, ses successeurs, lesdis bourgois et habitans et le païs d'environ peussent avoir esté prejudiciés et deppendans en pluseurs manieres, il est de neccessité que certaine provision ou ordenance fussent misez et faitez sur ce, et gardeez telles et selon ce que on verroit que bien fust, pour le commun proffit du peupple et de eulx entierement, sanz enfraindre, sur certaine paine, comme par toutes les bonnes villes du royaume de France ou l'en usoit de drapperie estoit, en nous requerant que ainsi le voulsissions faire, ou aultrement ne vouent pas que iceulx tiesserens peussent excercer leur dit mestier en ladite ville a l'onneur ne au proffit d'iceulx, des marchans ne du peupple. Sur laquelle requeste, nous eu consultacion et advis a pluseurs sages, meesmement aux gens et conseil dudit monseigneur l'archevesque estans en ladite ville, par lesquelx d'accort et sanz aucun contredit, nous eussons trouvé la chose faisable et pour le mieulx, par quoy affin de estre mieulx en ce instrus, eussions fait assembler tous lesdis tiesserens devant nous, a la cohue du lieu, a certain jour et heure avec aultres sages ad ce congnoissans, {Fol. 19}par lesquelx tisserens aprés que nous les eusmes enchargiez et par serement a nous aviser sur lesdites ordenances et chascun de soy selon la conscience, selon ce que ilz verront que il fust a faire pour le plus proffitable, eussent esleu six d'entre eulx, qui en diverses villes avoient ouvré dudit mestier, comme a Rouen, a Monstevillier, Neufchastel, Aufay et ailleurs, pour nous en faire relacion de par et pour tous lesdis tiesserens. Lesquelz, aprés que sur ce orent eu advis et deliberacion par grant intervale de temps, affin de la chose faire plus justement, nous eussent baillé par cedule tous les poins et articles que il leur sembloit estre a tenir et garder sur ce, sur lesquelz poins et articles nous eussions eu advis avec pluseurs sages, au conseil desquelx nous les eussions corrigés en y adjoustant et ostant selon que il nous sembloit que a y adjouster et sourtrere en feist ; savoir faisons que aujourd'ui, aprés que lesdiz tiesserens se furent tous representés devant nous, en lieu dessusdit et en jugement, et que de l'acort de eulx et au conseil des sages iller estans, lesdis poins, articles ou ordenances orent esté peuplieez et desclairieez jouxte et selon que cy aprés est contenu. C'est assavoir, premierement, que oudit mestier ne courra nulle platelaine a mains de seize cens tenante neuf quartiers, les cordeaux frans, en laquelle laine l'en pourra faire tous draps, excepté les tains en woide et par une, deux ou trois porteez mains se il escheoit, en poiant pour le deffault de chascune portee, c'est assavoir pour la premiere ourdié a seize cens, ii s., pour la seconde et pour tierce, pour chascune d'icelles, xii d. Et tous draps qui y seroient fais de mains ou en quoy il deffauldroit plus de portees, seroient forfais. Item, que en dit mestier courra aultres platez lainez de dix et huit cens et au dessus cellez de dix huit cens tenantes neuf quartiers et demi, les cordeaux frans, et les aultres au dessus tenantes a la cantité selon ce que ilz seroient, esquelles l'en pourroit faire draps par trois portees mains et par l'amende paiant comme dessus, et se plus y defailloit, ilz seroient forffais. Item, il courra aultres laines de quatorze cens treseles tennant deux aulnes demi quartier, les cordeaulx frans, esquelles l'en ne pourra faire fors que roussais, blanches et gardeaulx par trois portees mains, et par ladite amende paient comme dessus est dit, et se plus y defailloit, ilz seroient forfais, sauf que ce il y escheoit aucune mauvaise oeuvre que on ne peust faire sanz perdre la moitié. L'ouvrier qui le feroit seroit quitte pour perdre ce que fait en aroit, et est assavoir que cil a qui l'ouvrage seroit, la pourroit faire tistre a sa journee se il lui plaisoit. Item, l'en ne pourroit hourdir en quelque draps point de trayme ne adoitier point d'estam, ne tistre sengle, sur paine de estre perdus, mais les pourroit l'en bien tistre doubles. Item, l'en ne pourra tistre ne adjouster en quelque draps semblable trayme de plus grosse layne que celle des draps, se merque n'y avoit, sur paine de couper les draps et de estre forfais et acquis audit seigneur. Item, l'en ne pourra mettre en quelques draps point de gratiser ne de boure, sur paine {Fol. 19v}de les forfaire. Item, l'en ne pourra ourdir de plus fine laine aux costez des draps que ou milieu, sur paine de forfaire semblablement. Item, l'en pourra faire draps tains en moulee en feul ne en fostet, soit en laine ou fille, sur ladite paine. Item, l'en ne pourra tistre ne noer de nuit, sur paine de lx s. d'amende. Item, l'en ne pourra faire draps sanz liziere en quelque coute que l'en vouldra par paier l'amende, parce que iceulx draps sont diffamez et non marchans. Item, lesdiz tiesserens pourront avoir establiez en leur hostieulx pour arreer et parfaire de tous poins leurs propres draps et non aultres, et aussi les laneurs en leurs hostieulx mestier a tistre et faire leur propre draps et non aultres. Item, nul qui s'entremette dudit mestier, ne pourra avoir ne tenir plus d'un aprentif ensemble, pour cause des faulces oeuvrez que les ii pourroient faire se ensemble estoient. Item, nul aprentif dudit mestier ne seroit qu'il ne servisist trois ans. Item, qu'il vouldra ses draps ourdir, tramer ou balbiner, il le pourra faire par ainsi que ceulx a qui lesdiz draps seroient, en paieroient les amendes se ilz y escheoient. Item, nul ne pourra porter hors tistre, oeuvre qui soit labouree en la ville, pour les maulx et faulcetez que l'en y pourroit faire sur paine de lx s. d'amende, et en cas que portee y seroit, ceulx du mestier la pourront poursuir et arrester en la terre et juridicion dudit seigneur et ailleurs en tant que de raison seroit. Item, ou chimetiere de l'eglise Saint Jacque de ladite ville de Dieppe, a une crois estante en icellui, vers soleil de tierce, assembleront de jour en jour a l'eure que l'en oevre les portes de la ville, ceulx dudit mestier qui pour labourer d'icellui vouldroient estre mis en oevre, ou quel lieu ou place les personnes qui de eulz aroient a faire les yroient ou envoyeroient querre et aloer a leur oeuvre faire. Item, l'en commenceroit a ouvrer tous les jours des soleil levant ou enchiez se estre povoit bonnement que l'en y peust veoir suffisaument pour faire ouvrage deu et loyal, et laira l'en a ouvree a soleil couchent. Item, nul ne pourroit labourer dudit mestier jusques a tant que il ait fait foy et serement a tenir et garder ces presentes ordenances, auquel serement faire, chascun en icellui faisant paieroit xii d. pour le droit du juge pour recevoir ledit serement, et ii s. aux jurés establiz sur ledit mestier. Lesquelx jurés y seroient ordonez et mués de an en an ou plus ou moins, se a justice plesoit, par lesquelz chascun nouvel venu ou soy mettant au mestier seroit admené pour ledit serement faire, anchiez que il se meist a ouvrer comme ailleurs est accoustumé. Lesdites ordenances et chascune d'icelles jouxte et en la fourme dessusdite, furent concordablement tenues et rapportees pour bonnes, et les promistrent lesdis tiesserens tenir et garder chascun de soy et par serement loialment a son pouvoir sanz aucun deffault, selon que dit est. Et pour le temps de present furent ordonez et establis {Fol. 20}pour jurés sur ce, Ricart Lami, Guillaume Estienne et Guillaume Hebert jusques a un an prochain a venir du jourd'ui et de l'acort et volenté de tous les aultres tiesserens dessuzdis, lesquelz jurés furent enchargez de tenir et faire tenir et garder lesdites ordenances loialment et entierement de point en point, jouxte et selon que dit est, sans enfraindre, et de rapporter tous les deffaultz que il y appartendroient, en leur donnant povoir et auttorité de faire et exercer tout ce que audit office povoit et pourroit appartenir pour ledit temps, selon ce que dessus et que en aultres bonnes villes est acoustumé a faire, en enjougnant aux aultres tiesserens dessusdis que a eulx en ce faisant obeissent et entendissent diligaument et leur responsissent et avisassent de tout ce dont question leur seroit faite a cause d'eux par lesdis jurés, touteffois que il escherroit, et pour la paine et labour d'iceulz jurés et affin de entendre plus curieusement a ces choses, fu ordené que eulx aroient la moitié desdites amendes et ledit seigneur, l'autre. Et nous en tesmoing de ce, avons fait mettre a ces lettres le seel de ladite baillie de Dieppe, sauf tout autruy droit. Ce fu fait l'an mil ccc cinquante et huit, le dimanche nuefe jours ou mois de decembre.