Ordenance sur le fait des hostes des pescheurs.

Premierement, que tous les vendeurs de harens vendent ycelle denrees en lieu acoustumé, c'est assavoir entre la viconté et l'oppital, et non ailleurs, quant des nefz et bateaulx qui entrent en hable et de ceulz que pour basse eaue demeurent au pouillier ou sur la greve sur lesdiz lieux semblablement, afin que les marchans de ladite marchandise puisse avoir plaine congnoissance desdites ventes.

Item, que lesdis hostes fachent lesdites vendues nottoirement et publiquement et non muchement pour que lesdis pesqueurs puissent plus aplain avoir congnoissance de leurs choses veant tous et hautement, et lesdiz marchans marchandens semblablement.

Item, pour ce que en ladite ville, l'en a acoustume que es nefz et vaissiaulx appartenans auxdis pescheurs, lesdiz hostes vendans lesdites denreez pevent clamer la moitié en chascune nef de ladite pesquerie que l'en appelle lays, pour paier le pris que l'autre moitié est vendue au proufit dudit marchant, il est ordené que il en useront doresenavant en ceste forme.
Premierement, lesdis hostes vendront de chascune nef ou vaissel appartenant auxdiz pescheurs, leurs hostes, la moitié avant tout appartenant auxdis pesqueurs ainssi nottoirement comme dit est. Et se c'est chose qu'il vendent toute la carche desdites nefz ou vaissiaulx sanz faire mencion que esdites nefz ont droiture en la moitié pour cause de leur lays especifier esdites vendues faisans, ilz en seront fort clos, et se dire le veullent et especifier et il en pevent prendre avantage, il sera leur, pourveu que ce non obstant a quel pris que il le vendent ledit hoste en fera paiement de chascun vaissel auxdis pesqueurs aux pris de ladite vente faire pour eulx. Et se fraude est sur ce congnue {Fol. 34}ou apercheue, il y sera pourveu, et aront xii d. pour livre, et seront tenus de faire bon l'argent des pescheurs ou marchans ce moiennant.

Item, en chascun desdis vaissiaulz, n'auront que la moitié comme dit est, de laquelle moitié s'il le transportent ensemble ou parties en quelque maniere que ce soit, il n'en prendront aucun prouffit en acquest, ne mes seulement que de leur dite porcion. Et se ilz le vendent a pluseurs personnes, ilz n'en prendrons aucun acquest, se il n'est dit et exprecé auxdis marchans et chascun d'eulx, et s'il avenoit que de la cantité vendu pour lesdiz pescheurs, comme dessus est dit, ilz preissent autre restitucion ne prouffit que xii d. pour livre, ilz seroient pugnis griefment par amende volontaire.

Item, ilz ne contracteront avec lesdiz pesqueurs, par quelque maniere que ce soit, de leur droiture, mais le prendront tel comme il esquerra de chascun vaissel.

Item, iceulx vendeurs n'aront aucuns facteurs ou gouverneurs soubz eulx affin que en leur faveur, ilz n'auront le meilleur harenc et que ilz ne l'aront au pris du pire ou moyen.

Item, ilz tendront bon compte et loyal auxdis pesqueurs et gens a qui lesdites denrees seront et plaine satisfacion et de leur moitié au pris que ledit premier marché ara esté fait, sanz faveur de port ou collusion aucunement.

Item, pour ce que ilz sont et seront carchez de faire venir auxdis pesqueurs lesdites ventes, et que, a qui que les vendeurs baillent ou livrent, ilz convient que ilz en facent restitucion et que ce pourcachent a leurs purs coux, frais et despens, sans que iceulz pesqueurs en soient tenus a contribuer en aucune maniere, ilz prendront xii d. pour livre sur lesdites denrees appartenant seulement auxdis pesqueurs, sanz riens prendre sur le droit acquit du seigneur comme dit est.

Item, lesdis hostes feront chascun an serement de tenir, garder et acomplir chascune des articles dessusdites. Lesquelx seremens seront enregistrés es registres de monseigneur, se sommez en sont.

Item, seront tenus les hostes vendeurs de faire rapport de jour en jour en la viconté des congiez par eulx pris en ladite viconté pour les pescheurs, se il plest au recepveur.