Aultre coustume trouvee es anciens registres et pour ce ycy mise, laquelle ensuit.

Aultre coustume doubteuze, laquelle n'appartient pas approuvee ne aussi du tout reprouvee, pour ce que de quel temps l'en a use, on ne scet. C'est assavoir, s'aucuns porte aucunes marchandises de la ville de Dieppe devant nonne la veille Saint Michel par la licence de la garde de la viconté de Dieppe, et il n'a paié son acquit devant heure de nonne, il est tenu de paier aprés nonne tout ce qui devoit par avant et le double. Est assavoir, se il devoit paier x, il doit paier xx, et cetera, tousjours en doublent. A laquelle coustume poy ou neant, je m'areste pour ce que oncquez je n'en vy user ne n'oy parler se n'est par la maniere que dessus est escripte en la {Fol. 17v}coustume precedente a laquelle je me arreste pour ce que bien la scay.