Autre coustume a Dieppe sur sueurs et cordouaniers.

Il est assavoir que tous sueurs et cordouaniers demourans a Dieppe qui font neuf ouvrage, qui achettent cuir tané venant dehors sanz couroier, ne le pevent mettre en l'ouvrage devant que les jurés du mestier ayent veu ledit cuir se par aultres jurés estrangés n'est approuvé suffisament en aultre marché hors de Dieppe. Et doivent iceulz jurez de Dieppe estre commis par la justice de monseigneur pour visiter les cuirs venant au marché et ceulz qui mis sont en oeuvre par les dessusdits, lesquelz jurés doyvent marcher lesdiz cuirs quant ilz sont suffisant, et se lesdiz cuirs ne sont trouvez assez tennez, lesdiz jurés les font reportés taner aux taneurs estrangers, lesquelz taneurs sont tenus de rapporter^aRépétition de de rapporter. iceulz cuirs bien tanez au marché a Dieppe, ne ne les pevent vendre jusques aprés ce que lesdiz jurez les aront reveuz. Et si font le contraire, ilz sont tenus a amende.

{Fol. 15}Item, les dessusdiz sueurs et cordouaniers ne pevent faire soulez pour vendre dont les semelles soient de cuir de cheval, ne ne pevent couldre, ne tailler a la chamdoille de nuit. Et semblablement ne pevent carreller de nuit ceulz qui font aucun ouvrage de neuf. Et se aucun fait le contraire et est trouvé par les jurez, ils sont tenuz de amender, est assavoir de v s. t., dont les iiii s. appartiennent a monseigneur et xii d. auxdiz jurez. Et des status dudit mestier est faite lettre du consentement de ceulz du mestier cy aprés escripte a laquelle je me rapporte.

A tous ceulz qui ces lettres verront, Jehan de Ribeuf, bailli de Dieppe, salut. Comme pour le bien et utilité du mestier de suerie et de cordouanerie, les regars et pluseurs aultres d'icellui mestier eussent avisé sur pluseurs fraudes et malices dont cotidiennement l'en usoit en icellui et aussi sur le fait des marchans vendans cuir endite ville et sur les laboureux d'icellui mestier allans querre cuir hors pour leur mestier faire, lesquelles fraudes ilz nous fussent venuz denoncier en nous requerant sur ce pourveance estre mise, et sur leur requeste eussions fait assembler les personnes ouvrans d'icellui mestier ou la greigneur partie, pour et afin que sur ce pourveon au remede desdites fraudez et malices, lesquelz nous rapporterent les remedes ad ce neccessaire en court et en jugement, leur accort et deliberacion sur ce fais, en la maniere qui ensuit. Premierement, que nul ne queuze ne taille, soient soullers ou aultres choses touchant le mestier de suerie et cordouanerie, se n'est de jour, et aussi par pareil, ceulz faisant vielle oeuvre ne en lieu obscur ne muche pour ce que lesdiz ouvriers ou dit mestier se pourroient excuser pour ce de vielle oeuvre faire et se pourroit estre neuf ne oeuvré. Item, que en empiegne de cordouen, en icelle il n'y ait que cordouen, ne en soullers de vache que l'en n'y mette que vache. Item, que nul dudit mestier ne face soullers de mouton ne de cuir, se il n'est bon et loyal audit des jurez. Item, que nul ne mette semelle de cheval en soullers nulz. Item, que tous marchans qui vont achetter cuir hors, que icellui ilz ne mettent en oeuvre par quelque voye que ce soit, jusquez a tant que les jurez l'aront veu. Item, pour faire le mestier plus loyalement que l'en couroye son cuir par nuit tout au mieulx qui l'en pourra. Item, que les marchans qui viennent de hors, qui apportent cuir ou envoyent, soit visité par lesdiz jurés a ce ordonez a heure de nonne. Item, que le cuir qui sera mauvaisement tenné soit rapporté tenner par celluy a qui les cuirs seront ou par cellui qui pour et ou nom de lui l'aura apporté en la ville de Dieppe soit remporté pour le faire tenner, et ledit cuir ou cuirs rapportez en ladite ville soient monstrez aux jurez et a eulz baillez pour juger se il est tenné souffisamment. Item, que les jurez qui yront par ville pour faire la visitacion sur lesdiz ouvriers, leurs maisons et hastelliers {Fol. 15v}leurs soient ouvert sanz contredit et benignement. Item, que par iceulz jurez seront tenus veoir les soullers qui apportez seront a l'estal ou au marché pour oster aucune fraude ou malvaistié, se elle y est trouvee. Et ceulz qui seront trouvez couppables es choses dessusdites paieront v s. t., dont le seigneur aura iiii s. et les gardes xii d., et avecquez ce, se l'euvre est trouvee faulce, elle sera condampnee. A toutes lesquelles choses les gens et ouvriers d'icellui mestier, tant pour eulz comme pour les aultres ouvriers d'icellui mestier qui ores sont ou seront pour le temps a venir, se submistrent et acorderent sanz debat que ilz puissent mettre, sauf tant que en cas a ceste presente ordenances convendroit mettre ou adjouster, oster ou plus desclairer, lesdis ouvriers le seront tenus requerre devert justice et par justice y sera pourveu, comme il appartiendra. Et ad ce garder furent serementez iiii hommes dudit mestier, dont les noms sont contenus ou memorial cy annexé, qui firent le serement de ce garder et de rapporter les couppables ou dit mestier, affin de en faire pugnicion comme il appartendra. En tesmoing de ce nous avons mis a ces lettres le grant seel aux causes dudit bailliage, qui furent fetez l'an de grace mil ccc iiiixx et vi en mars.