La coustume des poissons, des batiaux pesqueurs et la maniere du cueillir par tout l'an, excepté le mois d'aoust entier, que nul pescheur ne doit coustume de poisson prins a harnais et trumaulx.

Premierement, il est assavoir que depuis la veille de Penthecoustes a nonne jusques a la Toussains, de chascun pesqueur, pour la coustume d'un bastel, de chascune maree, i congre, le meilleur du batel, en quelque maniere que il soit pris. Et depuis la Toussains jusques a Penthecouste a nonne, congres ne doivent riens, se ilz ne sont pesquiés a hoc, heribel ou molinel ou se ilz sont trouvé en la nef, mais en quelque maniere que il lui soit trouvé, il doit coustume.

Par tout l'an, on doit de chascun batel, pour chascune marée, le meilleur morue que soit en la nef, mais que elle vaille iiii d. ob., se il n'y a congres pesquez par la maniere que dit est.

Item, chascun pesqueur de mellens doit de coustume, de chascun batel, pour chascune maree, viii mellens, ne des pires, ne des meilleurs, se il n'y a morue ou mulotin qui vaille iiii d. ob. ou congre comme dessus est dit.

Item, de chascune batellee de rougés et de tumbes, on doit une tumbe, la meilleur, se il n'y a morue ou congre comme dessus. Et se il n'y a morue et tumbe, ne congre comme dessus, il ara le meilleur poisson qui y soit, sy comme rayes, plis, sartez, bresnez, solles et aultres poissons, excepté dorée, trubot, besqués et tout poisson royal et rouges ne doivent rien.

Item, il est assavoir que aux frans pesqueurs on doit, de chascune maree, se ilz paient coustume, ob., pour chascun franc. Mais ou cas que la coustume du batel ne vault tant comme ce que on paieroit aux frans d'icellui batel pour ladite maree, on leur puet lesser la coustume pour leur franchise.

Item, il est assavoir que maqueriaux qui sont pris a lingne et aux hams sont frans en tous temps a la boeitte, mais il s'acquite a la ferme des poissons par autres poissons pris avecquez eulz, de quoy coustume soit paiés ; mais se ilz sont prins et il n'y a aultres poissons de quoy on paie coustume, ilz doivent coutume, c'est assavoir iiii maqueriaux.

Item, maqueriaux pesquiez avec les harens, depuys la Saint Michel jusques a la Candeleur, ne doivent riens a la boitte, mais ilz doivent coustume au fermier, est assavoir, de chascune maree, iiii maquereaux.