Aprés ensuit une sentence ja piecha donnee sur les bouchers et pastoiers.

Item, il est assavoir comme contens et debat feust meu entre les bouchers de la ville de Dieppe d'une part, et les pastoiers de la ville d'autre, sur ce que lesdiz bouchers voulloient que les pastoiers ne puissent vendre a Dieppe char cuite en leurs maisons, de beuf, de mouton ou de porc, ne faire tuer les bestez, ne escorcher, ne despecier es maisons desdis pastoiers. Les maistoiers disant au contraire par pluseurs raisons que ilz proposoient.

Sachent tous que en l'an de grace mil ccc et iiii, le jeudi aprés le senne d'esté, ordoné fu du conseil de trés reverent pere G. par la divine grace, archevesque de Rouen, pour le commun prouffit, que les devant diz pastoiers puissent cuire char en leurs maisons, de mouton, de buef ou de porc en pasté ou en rost ou cuite en l'eaue, mais char crue ne pourront il vendre a fenestres ne en leurs maisons, et telle maniere que {Fol. 7v}toute leur char soit premierement amenee en la boucherie et veue par les jurez de la boucherie, vive, morte et esprouvee bonne et loyale avant que les pastoiers les puissent porter en leurs maisons. Item, lesdiz pastoiers tueront et escorcheront, ou feront tuer ou escorcher a couvert prés de la boucherie, que le sanc ne les ordures ne soient espanduez en rue. Item, des bestes que lesdiz pastoiers tueront, les trippes sont venduez en la tripperie, non pas en leurs maisons. Item, de chascune beste que ilz tueront en la boucherie en la maniere dessusdite, ilz paieront a monseigneur l'archevesque de Rouen ii d. et apporteront leur poiement au terme de la Saint Michel et de Pasques. Et se les jurés ne vouloient veir leurs bestez, ils seront contrains par justice, a la volonté de justice. Et se les pastoiers estoient trouvez ne atains que ilz vendissent char creue en leurs maisons ou a leur fenestre, ilz perdront la valeur de toute leur beste, ja soit ce que ilz fussent pluseurs parchonniers a une beste. En telle maniere seront ilz pugnis se ilz emportent en leurs maisons devant que elle soit veue par les jurés en la maniere dessusdite. Et se il avenoit que ilz n'eussent de quoi paier, ilz perdront le mestier ung an et ung jour. Et jureront, lesdiz pastoiers, sur les saintez euvangiles de Dieu, toutes les ordenances contenues en ce present escript fermement tenir garder bien et loialment tout en la forme et en la maniere dessusdite. Et pour toutes ces choses faire tenir et garder a tous jours, nous avonz seellé ceste presente lettre du seel de la baillie de Deppe, sauf autrui droit. Donnee et faite en l'an et jour dessusdit.