La coustume de recepvoir la rente des estaulx aux bouchers et de la rente que ilz en font a monseigneur.

Il est assavoir que chascun boucher vendent char a Deppe doit pour son {Fol. 8}estal, soit en son hostel ou dehors, chascun an, a monseigneur, vi s., moitié a la Saint Jehan Baptiste et moitié a Noel. Et puet chascun boucher avoir tant de estaulx comme ilz leur plest, contenant chascun estal vii piez de lonc sur rue, en paient a monseigneur, de chascun estal, la rente dessusdite et auxdiz termes. Et ou cas ou ilz ne paieront ladite rente auxdiz termes, ilz doivent estre adjournez a certain jour a la viconté de venir paier ladite rente. Et ou cas que ilz ne paieront audit jour, ilz sont et doivent estre contrains a amende. Et s'il avient que dedens ledit jour qui leur est assigné, ilz ne aient paié ne gagé l'amende dedens le mois ensuivant, l'estal devient et retourne en la main de monseigneur, sanz ce que le tenant et possesseur dudit estal il puis jamais riens demander au temps a venir.

Il est assavoir que il y a autres estaulx pris par certains bouchers qui font a monseigneur certaine rente plus grande que les estaulx dessusdit ne font, contenuz ou rentier des rentes faisant mencion des estaulx de nouvel pris, dont les tenans font rente selon le bail par les gens de monseigneur a iceulx et y en puet avoir d'autres, se il plest a monseigneur, pour en poier rente selon que il demoure au desrain encherisseur.