La coustume^aRépétition de coustume. du barrage et la maniere comment on le doit cueillir.

{Fol. 12v}Premierement, le barrage se queult et paie a toutes les issuez de la ville. Chascun qui vient a la ville a la qui amaine cheval sanz scelle doit iiii foyz l'an tourtel, c'est assavoir au Noel, Pasquez, Saint Jehan et Saint Michel. Et en quelle maniere que il entre, entre deux termes, il doit de chascun cheval i d., et le puet cueillir et demander le barrier entre quelz ii termes que il veult, se il n'est franc.

Item, quiconquez amaine quarette a Dieppe, soit carchee ou wide, doit tourtel, de chascun des diz termes, ii d. en la maniere que dit est. Chascun cheval qui vient en la ville, chascune sepmaine, doit i d. pour pasnage ; et chascune quarette, ii d. De chascune somme de poissons fais doit, la somme fait deux penniers, i d ; et se il y a iii penniers sur i cheval, il doit ii d., autant d'un pennier comme de deux. De chascun milliers de harenc au petit compte, ii d., et se il est au grant compte, iii d. ; et se i cheval n'en portoit que i cent ou jusques au nombre de vc, au petit compte, il n'en paiera que i d. ; et se il en y a vic ou jusques au petit millier, il paiera ii d. De chascune quarette de moruez qui sont en benne, doit iiii d. ; et se ilz sont en penniers, chascun pennier i d. se il n'est franc. Chascune tacre de cuirs, tant a cheval comme a quarette, doit ii d. Tous colliers portans a col, se ilz portent denreez qui vallent xii d., ilz doivent i d., excepté ceulz qui portent pescaille, qui riens ne doivent. Et ceulz qui portent fer a leur col que ilz usent sur leurs enclumes. Et ceulz qui portens vieulx drapz et plusieurs aultres choses qui riens ne doivent, de chascune couste, ii d. ; de chascun traversain, i d. qui sont vendu. Chascun asne ou mullet ne doivent que demi acquit. Se il y a sur i cheval i cressomel de harens, il ne doit riens, mais que il soit du droit compte. Item, tous ceulz qui portent denreez de quoy coustume est deue, ilz doivent i d. de tourtel par tant de foiz comme il est devant dit. Item, il est assavoir que se aucun qui ait quarette et ait paié son tourtel, remue ses chevaulx et il en envoie a Dieppe aucun ou tous par aucune neccessité, mais que il ne lesse a tout pris la quarette, se il acquite sa quarette pour les chevaulx dessusdiz, de tourtel il ne doit riens dudit terme que il les ara acquitté sa quarette. Et supposé que il eust aultres chevaulx nouveaulx, mais que ilz fussent siens, et se il avoit aucun cheval estrangé acompaigné avec les siens par prest ou autrement, ledit cartier devroit i d. de chascun cheval. Chascune quarette de boys a ardoir n'est deu ii d. de tourtel et i d. de laignage a chascun desdiz termes. Nec inde excipiuntur liquis^bliquis est corrigé en ligna dans la marge par une main moderne. veniencia de nemore de Genval preste et non plus.

Item, tous ceulz qui apportent draps a Dieppe ou peaulx ou aultres choses et ilz ne le vendent, ilz ne doivent riens de tourtel a l'issue de la ville, mais que ilz n'en portent riens se ne sont leurs cordes ou leurs sarppillieres ; ne ceulz aussi qui portent tronneaulx, toutesvoiez ilz doivent porter le signe de la viconté. Tous ceulz qui apportent {Fol. 13} carbon, estraing, pierre, soit a cheval ou a quarette, sanz riens paier a la bare et sanz licence ne signe, s'en pevent aler. De ceulz qui portent mains d'un gallon de sain ou d'uille, s'en pevent aler sanz signe et sanz licence, ne riens paier a la bare. Tous ceulz qui sont frans a la boitte, sont frans de tourtel a la bare, excepté ceulz d'Appeville decha le pont, qui ne doivent point de coustume a la viconté et toutesvoiez doivent il tourtel.

Item, tous ceulz qui doivent coustume a la boette, doivent tourtel a la bare, excepté les residans en la ville de Dieppe, que combien que ilz paient, ilz doivent coustume a la boette ; de ce que ilz font porter hors de la ville, ilz ne doivent point de tourtel a la bare, ne sont tenus de riens paier.

Item, tous homme a pié ou a cheval qui aporte aucune chose pour son estorement pour i jour ou pour ii, sy comme pain, vin, poysson et tieulz choses, ilz ne sont tenuz de paier riens de tourtel. Toutesvoiez, ceulz qui ont chevaulx ou bestes doivent porter le signe de la viconté, ne ilz ne s'en pevent aler sanz la licence de cellui qui garde la viconté.

Item, tous ceulz de Dieppe qui apportent blé au moulin ou grain pour semer ne doivent point de tourtel ne porter signet.

Item, tous ceulz de Dieppe qui portent drapz au pareur ou peaulx a ouvrer, toillez a curer, draps et laines taindre ou filler qui doivent rapporter a Dieppe sanz vendre, ne doivent riens de tourtel, mais ilz doivent porter le signe de la viconté.

Item, [tous ceulx de Dieppe qui mainent porcs, vaches, boeufz et toutes autres] bestes nourrir hors de la ville en intencion de revenir a Dieppe sanz vendre, ilz ne doivent point de tourtel, mais ilz doivent porter le signe de la viconté. Et touteffois, cellui qui garde la boitte et la bare leur pevent faire serement que se ilz vendent aucune chose des choses dessusdites, que ilz en paieront la coustume a la viconté et le tourtel a la bare. Et ad ce sont tenus tous les manans a Dieppe, se par aucune raison ilz ne sont frans.