{Fol. 22v}La coustume des sergans de Dieppe et du Polet.

Il est assavoir que a Dieppe puet avoir tant de sergens comme il plest a monseigneur l'archevesque, et au Polet a l'en acoustumé que tousjours y en a un . Et est assavoir que lesdiz sergens de Dieppe sont tenus de estre et servir chascune sepmaine l'un aprés l'autre a la recepte avec le recepveur de Dieppe continuelment pour faire excecucions des debtes deubz a ladite recepte, et se commence la sepmaine au lundi matin jusques au dimanche au soir ensuivant, et doivent chascun jour disner au despens du recepveur. Et est assavoir que la sepmaine ensuivante que ilz aront esté sepmainniers en ladite recepte, ilz sont tenus de comparoir aux ples soit d'assize ou aultres chacun jour de la sepmaine ensuivante pour enregistrer et savoir ceulx qui feront amendes, lesquelles amendes, ilz sont tenus de fournir et faire valoir au recepveur sanz diminucion, se n'est d'aucuns mis en amendes par jugement qui n'ayent riens et desquelz ilz ne puissent aucuns biens trouver. Et semblablement y est tenu le sergent du Polet.