La coustume des courretiers de vins et aultres marchandises.

Il est assavoir que a Dieppe est de coustume de avoir courretiers de vins et d'autres marchandises, lesquelz doivent estre mis par monseigneur ou ses gens et oster quant il lui plest, et doivent faire serement et loyalment excercer l'office de coureterie. Lequel serement ja pieça recepvoit le recepveur de Dieppe comme appartient par les anciens registres. Et doit chascun courretier de vin comparoir a l'estappe chascun jour pour veoir s'aucuns vins y sont venus pour vendre, et aussi sur le hable pour la venue de la mer. Et sont tenus par leurs seremens de conseiller loialment les marchans forains a vendre leurs dis vins et marchandises et iceulz vingz et derrees aler anoncier par ville. Et est assavoir que pour chascun tonnel de vin vendu par le conseil de courretier, il doit avoir du marchans vendant, iii s. t., de chascune queue, xviii d., et de chascun poisson, ix d. Et est assavoir que d'aultres marchandises quelconques vendues par marchans estrangiers a Dieppe par le conseil desdiz courretiers, iceulx marchans en font fin auxdis courretiers au plus bel qu'ilz pevent selon leur pover.