Et premierement, la coustume et maniere de prendre le droit de monseigneur l'archevesque sur pescheurs demourans en franc lieu.

Il est assavoir que se aucun homme franc est pescheur, et en sa pescherie ait acompaigné avec lui ung non franc, ledit franc ne doit pas telle coustume comme le coustumier, non obstant que sa part de toute la pescherie, deue comme s'il estoit coustumier, doit estre recepue en la main de monseigneur, et aprés lui deuement approuvé estre franc, lui doit estre rendue, excepté le xe d. qui doit demourer a mondit seigneur. Et est assavoir que de mendre nombre que de v d., il ne doit riens ; mais de v d., i d. ; et de greigneur nombre jusquez a xiiii^aB : xii., il ne doit que i d. pour coustume, pour xe. Et combien que a present les franchises se paient par la main des hostez, si le puet le seigneur rappeler et faire par sa main paier quant il lui plaira.